Administrata e ish-presidentit Donald Trump ka shpallur zyrtarisht tetë organizata të krimit të organizuar në Amerikën Latine si “organizata të huaja terroriste”, duke rritur trysninë ndaj karteleve të drogës dhe rrjeteve që i mbështesin.
Ky vendim, i bazuar në një urdhër ekzekutiv të lëshuar më 20 janar, përfshin grupe kriminale si Tren de Agua nga Venezuela dhe MS-13 nga El Salvador.
Masa do të zyrtarizohet të enjten në Regjistrin Federal.
Një nga prioritetet kryesore të administratës Trump ka qenë sigurimi i kufirit SHBA-Meksikë, ku ai ka ndërmarrë politika për dëbimin masiv të emigrantëve të paligjshëm dhe ka dërguar trupa ushtarake për të forcuar kontrollin.
Përcaktimi i karteleve si organizata terroriste është një lëvizje e pazakontë, pasi kjo etiketë zakonisht i atribuohet grupeve si al-Kaida ose Shteti Islamik, të cilat përdorin dhunë për qëllime politike.
Administrata Trump argumenton se këto grupe përdorin dhunë, trafik droge dhe kontrabandë emigrantësh për të zgjeruar kontrollin e tyre dhe se lidhjet e tyre ndërkombëtare e justifikojnë këtë klasifikim.
Megjithatë, kritikët paralajmërojnë se kjo masë mund të dëmtojë marrëdhëniet me vendet e Amerikës Latine dhe të krijojë pasiguri në sektorë të ndryshëm ekonomikë.
Ndër shqetësimet kryesore është rreziku i ndjekjeve penale për entitete të lidhura me kartelet, përfshirë banka dhe biznese që mund të kenë kontakte indirekte me këto grupe.
Kartelet kanë një ndikim të ndjeshëm në ekonominë meksikane, jo vetëm përmes trafikut të drogës, por edhe duke ndikuar në tregje të mëdha si industria e avokados, e cila vlen miliarda dollarë.
Grupet e ndihmës dhe organizatat e biznesit kanë shprehur shqetësime për efektet që ky vendim mund të ketë mbi importet dhe eksportet e ushqimeve.
Në përgjigje të kësaj mase, presidentja e Meksikës, Claudia Sheinbaum, deklaroi se Meksika do të mbrojë sovranitetin dhe pavarësinë e saj, duke theksuar nevojën për një bashkëpunim dypalësh me SHBA-në në luftën kundër karteleve.
Ajo nënvizoi se kjo luftë duhet të zhvillohet brenda territoreve të të dy vendeve, përmes koordinimit dhe strategjive të përbashkëta.
