Prokuroria e Posaçme ka përfunduar hetimet dhe ka dërguar për gjykim dosjen penale ndaj gjashtë ish-zyrtarëve të Autoritetit Rrugor Shqiptar, të akuzuar për parregullsi në një procedurë tenderuese me vlerë 22 milionë euro për segmentin “Mbikalimi Pallati me Shigjeta, Rrethrrotullimi Shqiponja”.
Zyrtarët Arbër Troka, Miranda Shkurti, Nikollaq Mihali, Almir Hoxhaj, Erjon Zemanaj dhe Admir Pahumi akuzohen për veprën penale “Shkelje e barazisë së pjesëmarrësve në tendera apo ankande publike”, në bashkëpunim.
Tenderi është zhvilluar në vitin 2019 dhe është fituar nga bashkimi i operatorëve “Salillari” dhe “Bajrami N.”
Sipas SPAK, gjatë procesit të prokurimit janë konstatuar shkelje të rënda të ligjit, të kryera përmes veprimeve të kordinuara mes zyrtarëve të pandehur, që kanë cenuar konkurrencën e ndershme dhe interesat ligjore të shtetit.
Autoritetet kanë sekuestruar dokumentacion të gjerë që përfshin dosjet teknike, ofertat, vendimet e Komisionit të Prokurimit Publik si dhe dëshmi të përfaqësuesve të kompanive pjesëmarrëse dhe ankimuese.
Hetimi është pjesë e një çështjeje më të gjerë, të regjistruar nga SPAK në vitin 2022, që përfshin disa procedura tenderimi të zhvilluara nga ARRSH gjatë periudhës 2019-2021, për të cilat hetimet ende vijojnë.
Dosja për këtë rast konkret është veçuar si “Procedimi penal nr. 175/1/4 i vitit 2025”, që përfshin tenderin me numër referimi REF-26436-06-13-2019, për një fond limit prej mbi 2.25 miliardë lekësh pa TVSH.
SPAK konstaton se shkeljet e bëra kanë ndikuar në mënyrë të drejtpërdrejtë mbi rezultatin e tenderit dhe kanë favorizuar në mënyrë të padrejtë një nga operatorët ekonomikë.
