Anëtarët e OKB-së miratuan një rezolutë që mbështet integritetin territorial të Ukrainës, ndërsa SHBA paraqiti një rezolutë alternative, pa përmendur drejtpërdrejt fajin e Rusisë për luftën.
Rezoluta e mbështetur nga shtetet evropiane mori 93 vota pro, 18 kundër dhe 65 abstenime. Shqipëria, Serbia, Mali i Zi, Maqedonia e Veriut dhe Bosnjë e Hercegovina votuan pro.
Teksti kritikon ashpër Rusinë dhe thekson paprekshmërinë e kufijve të Ukrainës.
Ndërkohë, Uashingtoni hartoi një rezolutë rivale mes përplasjeve mes presidentit amerikan, Donald Trump, dhe atij ukrainas, Volodymyr Zelensky.
Ambasadori rus në OKB e cilësoi tekstin e SHBA-së si “hap pozitiv”, ndërsa Franca dhe shtetet evropiane kundërshtuan versionin fillestar, duke shtuar në të formulime që fajësonin drejtpërdrejt Rusinë për pushtimin. Hungaria votoi kundër amendamenteve.
Pas ndryshimeve, Uashingtoni abstenoi për tekstin e vet. Rezolutat e Asamblesë së Përgjithshme të OKB-së nuk janë detyruese, por reflektojnë opinionin global.
SHBA planifikon ta paraqesë rezolutën e saj edhe në Këshillin e Sigurimit, ku do të përdorë veton nëse Rusia apo vendet evropiane kërkojnë ndryshime.
Për miratim, një rezolutë në Këshill kërkon të paktën nëntë vota pro dhe asnjë veto nga pesë anëtarët e përhershëm.
