Nënkryetari i bashkisë së Durrësit, Florian Tahiri ka dhënë dorëheqjen ditën e sotme.
Dorëheqja ka ardhur për shkak të kandidimit për deputet në Durrës. Ai do të jetë pjesë e kandidatëve për deputetë të PDIU-së.
I emëruar në bashki në shkurt të vitit 2016, Florian Tahiri, erdhi në këtë post nga radhët e PDIU-së, forcë politike në të cilën është pjesë prej vitesh.
Kujtojmë se sot është afati i fundit që partitë politike të dorëzojnë në KQZ listat e kandidatëve për deputet. Opozita e bashkuar ka lidhur marrëveshje parazgjedhore, ku përfshihen PD, LSI dhe aleatët e tyre, ndërsa PS mësohet të shkojë e vetme në zgjedhje.
Nga PS kanë bërë të ditur se nuk do të garojnë për deputet, Vasilika Hysi, Sadi Vorpsi, Besnik Baraj , Alfred Peza e Rreme Lala, e cila kishte konfirmuar me herët se do ishte në listat e PS. Deri tani janë bërë të ditur dy emra të rinj që do të kandidojnë nën siglën e PS, mjekja Najada Çomo dhe inxhinieria Luljeta Bozo.
Po kështu, edhe në PD po i jepet dora e fundit listës së kandidateve për deputet.Deri tani nga selia blu janë publikuar emrat e koordinatorëve, ku bien ne sy emra te rinj si Belind Kellici kreu i FRPD, Gazmend Bardhi, Alfred Rushaj e Tomorr Alizoti që për herë të parë garojnë për deputet respektivisht në Tiranë, Elbasan e Berat. Po kështu rikthehet Mark Marku, i cili drejton qarkun e Lezhës, Bujar Leskaj qarkun e Vlorës dhe Helidon Bushati qarkun e Shkodrës.
