Propaganda dhe premtimet e kryeministrit nuk kanë munguar në kohë fushate. Pas zvarritjes që iu bëri qytetarëve të dëmtuar nga tërmeti shkatërrues i Nëntorit, dy vite pas dhe vetëm një muaj larg zgjedhjeve, Edi Rama i “kushtëzon” shqiptarët se rindërtimi ndalet nëse nuk votojnë PS.
“Filli i këtij procesi këputet dhe nëse më 25 prill fatet e vendit bien në duart e atyre që janë të njohur për shkatërrimin që kanë bërë”, thotë Rama shqiptarëve.
Sot kryeministri ka inspektuar lagjen e re në Rrëshen, nga ku premtoi se do të ndërtohen 35 banesa individuale, 6 pallate dhe 68 apartamente.
Të gjitha këto kryeministri i premtoi për vetëm 7 muaj. Ndërkohë që nga 26 Nëntori i “zi” i vitit 2019, e deri më tani, janë rindërtuar vetëm pak shtëpi për qëllime fushate, por që gjithsesi nuk e kanë “zhbërë” problemin e qytetarëve.
Por për Ramën, rindërtimi po ecën me hapa të mëdha, madje i krahasoi ndërtimet e reja në Rrëshen me resortet turistike.
“Zonat e reja në zhvillim, janë njësoj si resortet turistike që jemi mësuar të shohim”, u shpreh Rama.
Pavarësisht se në Lezhë rindërtimi sipas pretendimeve të kryeministrit përfundon në vetëm pak muaj, një tjetër realitet vjen nga Durrësi, i cili ishte dhe ndër qytete më të prekur. Mesa duket rindërtimi këtu po ecën mjaft ngadaltë dhe këtë e deklarojnë vetë banorët.
Kompleksi “Jedas” është njëri prej komplekseve më të mëdha të banimit që ka pësuar një dëmtim të shkallës së lartë, DS4, por puna për rikonstruksionin e tij nuk ka nisur ende.
Pas këtij pallati, një tjetër është shembur tërësisht që në muajin tetor, por mungesa e rrethimit dhe nisjes së punimeve e ka kthyer në një vend të rrezikshëm për banorët e lagjes.
Deri tani Bashkia e Durrësit ka shpërndarë 1000 grande për rikonstruksionin e banesave, ndërsa ka në proces për miratim edhe 5700 aplikimeve te reja.
Në zonën e Kënetës një çift të moshuarish, të cilët kanë mbetur pa strehë ndonëse marrin një bonus, në shtëpinë e marrë me qira shkojnë vetëm gjatë natës, me shpresën se ditën dikush nga grupi i rindërtimit do të vij t`i kërkojë.
“Unë jam 80-vjeç, gruan e kam 78-vjeç, shtëpinë nuk janë duke e bërë, fjalët e mira, po gurët në tratsë. Nuk ka bërë gjë, boll kam shkuar te njësia, thonë nuk kanë ardhur letrat”, u shpreh i moshuari.
Qeveria mesa duket e përdori pandeminë në funksion të saj, por zvarritja e procesit të rindërtimtit nisi që pa filluar pandemia.
Kujtojmë se deri më 10 mars të vitit 2020, nuk ishin shpallur ende gara për kompanitë që do të ndërtonin banesat individuale, ndërkohë që izolimi ndodhi që prej datës 9 mars të vitit 2020.
Mesa duket slogani që na shoqëroi gjatë muajve të vështirë të tërmetit “ti nuk do të jesh kurrë vetëm” duket qartë se u shndërrua” një shtëpi një votë”.
