Gjykata e Pogradecit është mbyllur pasi punonjës të këtij institucioni kanë rezultuar pozitiv me koronavirus. Mësohet se Gjykata do të qëndrojë mbyllur deri në darën 17 mars, pasi janë infektuar nga COVID tre gjyqtarë, katër sekretare dhe drejtuesja e Prokurorisë.
E para që kishte rezultuar pozitive ka qenë një prej sekretareve tre ditë më pare, duke infektuar më pas edhe të tjerët. Ndër të tjera mësohet se edhe kontaktet e ngushta të personave të infektuar do të gjurmohen për t’u testuar nëse edhe ata janë prekur nga virusi apo jo.Ndërkohë, kryetarja e gjykatës rezulton që ta ketë kaluar më parë Covidin edhe për këtë me shumë mundësi do të qëndrojë në gatishmëri për të dhënë masat e sigurisë.
Pas mbylljes së këtij institucioni do të bëhet edhe dezinfektimi i plotë nga Njësia Vendore e Kujdesit Shëndetësor,i Gjykatës së Pogradecit.
Edhe në Bashkinë e Pogradecit janë shtuar rastet pozitive me COVID dhe kanë rezultuar të prekur tre zv/kryetarë dhe disa drejtorë drejtorish, ndërsa edhe në qarkun e Korçës vijon të jetë i lartë numri i rasteve active me virus. Në të dhënat e fundit të Ministrisë së Shëndetësisë bëhet me dije se numri i personave që aktualisht janë pozitiv me virusin është 880.
