Ministrja e Shëndetësisë dhe Mbrojtjes Orgeta Manastirliu ka hedhur poshtë zërat se në Shqipëri ekzistojnë disa nga mutacionet e reja të Covid 19.
Në një deklaratë për mediat ditën e sotme, Manastirliu tha se një grup i posaçëm është duke u marrë me këtë problematik, duke kryer një sërë analizash dhe verifikimesh.
“ISHP dërgon në mënyrë të vazhdueshme mostra të analizave qoftë për mutacionet e reja që kanë dalë, qoftë edhe për analiza rutinë, për verifikimin dhe certifikimin që i duhet në vazhdimësi për të bërë për punën e tyre. Është një proces, është dinamik. Deri tani ne nuk kemi identifikuar raste të varianteve të reja të COVID-19, por puna është duke vazhduar”, tha Manastirliu.
Më tej ministrja i bën apel qytetarëve të tregojnë kujdes të vazhdueshëm, pasi është e vetmja formë për të mbrojtur veten dhe të afërmit.
“Ju bëj thirrje qytetarëve për vigjilencë të shtuar, të bëjmë maksimumin sepse jemi në një situatë delikate për të mbrojtur veten dhe të afërmit tanë”, tha ajo.
Kujtojmë se kohët e fundit në vend po qarkullojnë zëra dhe dyshime se mutacioni i ri britanik ka mbërritur dhe tek ne.
Një ndër mjekët që e hodhi si dyshim është dhe Epidemiologu Ilir Alimehmeti. Në një in tervistë të dhënë për Euronews, ai tregoi për një sjellje të re të virusit kohët e fundit. Sipas tij, ajo konsiston tek disa tregues të veçantë siç është kohëzgjatja e shkurtër dhe shfaqja shumë intesive.
“Pastaj kemi atë të panjohurën, që ju përmendët pak më parë, sa mund të jetë depërtimi i formave të reja. Patjetër që edhe varianti britanik është edhe në Shqipëri, ka ndonjë dyshim? Është në Greqi, Maqedoninë e Veriut, në Kosovë. Nuk është në Shqipëri?!”, u shpreh mjeku.
Vlen për tu theksuar se deri më tani ende nuk është zbuluar zyrtarisht një rast i infektuaar me këtë muatcion të ri edhe pse dyshimet vijojnë.
