Kreu i Bashkisë së Petrinjës në Kroaci Darinko Dumboviç, i cili është edhe qyteti më i goditur nga tërmeti i sotëm, është shprehur për mediat se qyteti është shkatërruar krejtësisht.
Sipas kryebashkiakut në gjendjen e tanishme, qyteti i ngjason Hiroshimës, qytetit japonez që u godit nga një bombë bërthamore gjatë Luftës së Dytë Botërore.
Ndër të tjera, kryebashkiaku i Petrinjës deklaroi se mes viktimave ka edhe shumë fëmijë.
“Qyteti im është shkatërruar plotësisht. Kemi fëmijë të vdekur. Nuk mund të përshkruhet. Kjo është si Hiroshima. Ne kemi nevojë për zjarrfikës, nuk e dimë se çfarë ka nën sipërfaqe, ne kemi nevojë për ndihmë.
Ne po tërheqim njerëz nga vetura, nuk e dimë saktë numrin e fataliteteve sepse kemi të vdekur dhe të plagosur, gjithashtu dëgjova që kopshti ishte shembur, por për fat të mirë nuk kishte fëmijë në kopsht, ndërsa fëmijët e tjerë arritën t’i shpëtonim”, ka deklaruar për mediat Darinko Dumboviç.
Kujtojmë se një tërmet i fortë prej 6.4 ballë goditi mëngjesin e sotëm Kroacinë. Një tërmet i tillë, me po të njëjtën forcë goditëse goditi Shqipërinë 26 nëntorin e kaluar ku si pasojë mbetën të vdekur 51 persona.
Vendi ende i vuan pasojat nga tërmeti, pasi shumë familje edhe pse një vit pas tërmetit, vazhdojnë që të qëndrojnë në çadra apo në konteniera. /Gazetareforma.com/
