Katër muaj para zgjedhjeve të ardhshme parlamentare të 25 prillit 2021, Komisioni Qendror i Zgjedhjeve ka shpallur tenderin për identifikimin biometrik.
KQZ ka përcaktuar se kjo procedurë do të bëhet pa shpallje dhe me negocim, me gjashtë kompani të cilat iu përgjigjën thirrjes së mëparshme të KQZ-së për të paraqitur ofertat e tyre.
Kjo formë e zgjedhur ndihmon Komisionin Qendror të Zgjedhjeve të mos humbasë kohë, por nga ana tjetër nuk garanton transparencë të plotë mbi një tender që në total kap vlerën e rreth 27,5 milionë eurove.
Nga gjashtë kompani, vetëm njëra është shqiptare dhe synojnë që për zgjedhjet e ardhshme parlamentare të implementojnë identifikimin biometrik të zgjedhësve në të gjithë vendin si edhe dy projektet-pilot, votimin dhe numërimin elektronik.
Për identifikimin biometrik, KQZ ka parashikuar se nevojiten rreth 2,1 miliardë lekë ose rreth 17,2 milionë euro. Aktualisht, qeveria i ka alokuar vetëm 20% të vlerës, ndërsa pjesa tjetër do të kalojë në fillim të vitit të ri.
Ndërsa, për dy sistemet pilot nevojiten rreth 10,3 milionë euro në mënyrë që në 1100 qendra votimi për herë të parë të bëhet votimi elektronik e më pas numërimi elektronik i tyre. KQZ i ka lënë afat kompanive që të paraqesin zyrtarisht ofertat deri në datën 5 janar e më pas, në mesin e muajit të parë të vitit të ri, të shpallet edhe fituesi.
Burime për mediat bëjnë me dije se të enjten u është kërkuar kompanive që të japin ofertat e tyre për realizimin e identifikimit biometrik të votuesve në të gjithë Shqipërinë.
KQZ vendosi që tenderi për teknologjinë në zgjedhjeve të bëhej me negocim pa shpallje herën e parë që u çuan dokumentet për të nisur procedurat në Agjencinë e Prokurimeve Publike. Kjo procedurë u kthye mbrapsht, duke iu përgjigjur KQZ-së se nuk ka çuar arsyetim të mjaftueshëm për të zhvilluar tenderin me negocim pa shpallje.
Kjo bëri që procesi për nisjen e tenderit për identifikimin biometrik të vonohej. Kjo bëhet shqetësuese kur faktori kohë është shqetësimi më i madh i realizimit të projektit për identifikimin biometrik të zgjedhësve.
/Gazetareforma.com/
