Një shpërthim i madh mësohet se ka ndodhur ditën e sotme në qendër të qytetit të Nashville në SHBA, ku një makinë e parkuar ka shpërthyer në orët e para të mëngjesit.
Lajmin e kanë bërë të ditur disa media lokale amerikane, të cilat raportuan se për shkak të shpërthimit të fuqishëm, tre persona kanë mbetur të plagosur.
Bëhet me dije se tre të plagosurit janë dërguar menjëherë në spital, ku po marrin edhe trajtimin e duhur mjekësor.
Autoritetet policore në SHBA, kanë hedhur dyshime për një sulm terrorist, pasi menjëherë pas shpërthimit në vendngjarje në qendër të qytetit në Nashville, kanë shkuar një skuadër xhenierësh.
Bëhet me dije se sipas raportimeve nga mediat, shpërthimi i fuqishëm ka dëmtuar disa biznese dhe shtëpi aty pranë, xhamat e të cilave janë thyer.
Pas shpërthimit, zona dhe qytetarët janë evakuuar nga policia, ndërsa forcat xheniere kanë nisur hetimet së bashku me grupin e forenzikës për të zbardhur ngjarjen e rëndë e cila mund të kishte përfunduar edhe më fatalisht, pasi shpërthimi i fortë mund të merrte edhe jetë njerëzish.
Zona ku ndodhi shpërthimi është e mbushur me bare, restorante, dyqane të vogla dhe njihet si zemra turistike e qytetit.
Ndërkohë edhe bashkia e qytetit të Nashville, ka lajmëruar qytetarët që të shmangin zonat e populluara dhe që të jenë vigjilentë./Gazetareforma.com/
