Situata nga pandemia e Covid-19 po vazhdon që të jetë shqetësuese në vend, pasi ende po vijon çdo ditë që të marrë jetë njerëzish.
Ky trend rritës i rasteve të reja dhe vdekjeve nga covid-19, ka bërë që kjo prirje të shihet me shqetësim nga qytetarët sidomos tani në prag të festave të fundvitit.
Shefja e Departamentit të Epidemiologjisë pranë ISHP-së, Silva Bino, ka folur sërish në lidhje me masat të cilat do të merren për menaxhimin e koronavirusit në vend.
Bino u shpreh se gjatë dy javëve të fundit vihet re një stabilizim i gjendjes, kjo dhe për shkak të masave të pjesshme që janë ndërmarrë.
“Jo, ne nuk kemi pasur një rritje drastike të numrave siç kishim vënë re tre apo katër javë më parë, por gjatë këtyre dy javëve të fundit vumë re një tendencë stabilizimi.
Kjo gjë vjen edhe nga masat e bllokimit të pjesshëm që ne kemi aktualisht, pasi mbajtja e maskave me detyrim në mjedisin e jashtëm ishte një masë, e cila nuk është respektuar aq sa duhet nga qytetarët shqiptarë, të cilët i mbajnë maskat, por i mbajnë në qafë dhe nuk i mbajnë ashtu siç duhet”, tha Bino.
Ndër të tjera mjekja Bino tha se shkenca ka vërtetuar tashmë se koronavirusi nuk përhapet vetëm nga spërklat e pështymës, por përhapet edhe përmes rrugëve ajrore.
Bino po ashtu u shpreh se nuk është e këshillueshme që për festat e fundvitit të udhëtohet nga një qytet në tjetrin, pasi sipas saj këto lëvizje do të rrisin mundësinë e përhapjes së Covid-19.
“Nga vendimet që do të merren, ajo çfarë unë do të thoja është që qytetarët të jenë të përgjegjshëm vetë, që të mënjanojnë udhëtimet nga një qytet tek tjetrit gjatë festave, sepse kjo shkakton grumbullime dhe transportim të virusit nga një qytet në tjetrin.
Sa më pak njerëz të qëndrojmë në shtëpitë tona dhe t’i festojmë me familjet tona festat, aq më mirë do të jetë në drejtim të kontrollit të virusit”, ka thënë Bino./Gazetareforma.com/
