Turqia do të ndihmojë Shqipërinë që të përballojë pandeminë Covid-19. Një delegacion i Komitetit të Ekspertëve turq për pandeminë e koronavirusit ka mbërritur në vendin tonë.
Delegacioni turk është takuar me ekspertët e Komitetit shqiptar, “për të shkëmbyer eksperienca dhe nxjerrë konkluzione”, siç u shpreh kryeministri Edi Rama, i cili është duke zhvilluar një takim “online” me të dyja grupet.
Rama tha se Komiteti i Ekspertëve turq dhe ai shqiptar do të bëjnë edhe një vlerësim të situatës së pandemisë në vendin tonë.
“Janë këtu për të shkëmbyer eksperienca, për të bërë një vlerësim të situatës, dhe sigurisht për të nxjerrë konkluzione të vlefshme për rrugën e bashkëpunimit të mëtejshëm. Pandemia është një luftë që asnjë vend s’mund ta luftojë i vetëm”, u shpreh Rama.
Profesori Rexhep Ozturk, ka thënë se do të ndihmojnë vendin tonë për të frenuar përhapjen e Covid-19, sipas një mënyre që është aplikuar në Turqi dhe ka dhënë shumë rezultat, por gjatë fjalës së tij ai nuk e tregoi se cila ishte.
“Dua tju përcjell mesazhet dhe të gjitha përshëndetjet e përzemërta të Presidentit të Turqisë, zotit Erdogan. Referuar telefonatës tuaj, që keni bërë me presidentin tonë, menjëherë jemi vënë në lëvizje dhe jemi mbledhur si anëtarë të Komitetit të Ekspertëve të Turqisë dhe kemi marrë rrugën për në Shqipëri. Me ftesën tuaj dhe të ministres së Shëndetësisë.
Me të zbarkuar në Shqipëri, jemi takuar dhe më anëtarët e grupit të punës nga shëndetësia shqiptare dhe kemi shkëmbyer mendime të ndryshme. Kemi parë të gjitha masat e marra ndaj Covid-19”, tha profesori turk.
/Gazetarefprma.com/
