Policia e Shtetit pretendon se një oficer i krimeve është plagosur ne sy me nje kapsollë. Sipas njoftimit, nga përplasja që ka ndodhur mes protestuesve dhe efektivëve tek Drejtoria e Policsë, ka mbetur i lënduar një efektiv.
Burimet bëjnë me dije se është plagosur në sy një specialist i hetimit të krimeve në Komisariatin nr.1, si pasojë e plasjes së një kapsolleje.
“Rreth orës 19:30, tek Drejtoria Vendore e Policisë Tiranë, si pasojë e gurëve dhe kapsollave të hedhura në drejtim të punonjësve të policisë nga turma e protestuesve është dëmtuar në pjesën e syrit nga një kapsollë një Specialist për Hetimin e Krimit në Komisariatin Nr.1, i cili u transportua menjëherë për ndihmë mjekësore për në spitalin ‘Nënë Tereza’”, deklaron Policia.
Ky është rasti i dytë brenda katër ditëve që një efektiv policie plagoset në sy gjatë protestave të qytetarëve pas vrasjes së Klodian Rashës. Efektivi i cili u dëmtua në protestën e parë rrezikon të humbasë syrin, por do të dërgohet në një spital në Turqi për t’ju nënshtruar një ndërhyrjeje kirurgjikale të specializuar. Policia nuk sqaron nëse efektivi u plagos kur ishte në mes të turmës me mision apo ndodhej pas kordonit të policisë.
