Klodian Rasha është qëlluar me dy plumba. Kështu thuhet në dosjen e përgatitur nga Prokuroria e Tiranës për vrasjen e 25 vjeçarit në Laprakë, dy ditë më parë nga një efektiv i skuadrës Shqiponja.
Nga hetimet ka dalë se nga arma e efektivit Nevaldo Hajdëraj janë qitur dy plumba. Plumbi i parë e ka kapur të riun në shpatull, në anën e djathtë, dhe i ka dalë në pjesën e zemrës. Për shkak se predha e plumbit ka prekur një prej arterieve kryesore, 25 vjeçari ka ndërruar jetë në vend.
Nga arma e efektivit është qitur dhe një plumb tjetër i cili nuk ka goditur drejtpërdrejt Klodian Rashën, por ka bërë rikoshet në mur dhe më pas e ka kapur në pjesën anësore të kokës. Vdekjen në vendngjarje të të riut e kanë konfirmuar dhe regjistrat e spitalit të Traumës ku 25 vjeçari u dërgua me ambulancë nga dy efektivët që e ndoqën.
Mjekët e këtij spitali kanë regjistruar aktin e vdekjes së të riut në orën 01.23 minuta të datës 8 dhjetor. Sipas tyre, Klodian Rasha ka mbërritur i vdekur dhe ata nuk kanë pasur asnjë mundësi për të dhënë ndihmën e parë.
Vetë oficeri Nevaldo Hajdëraj pretendon se ka qëlluar në pjesën e poshtme të trupit dhe nuk ka pasur për qëllim vrasjen e Klodian Rashës. Megjithatë akt-ekspertimi balistik i armës së tij dhe të Klodian Rashës nuk ka përfunduar ende. Prokurori Ardian Braho që ka drejtuar hetimet për ngjarjen, ka në dorë dhe pamjet e kamerave të 5 bizneseve të cilat tregojnë gjithë rrugën që ka bërë 25 vjeçari derisa është përballur me efektivët.
/GazetaReforma.com/
