Një ngjarje e rëndë ka ndodhur ditën e sotme në Korçë, pranë fshatit Zvirinë, ku në afërsi të vendit të quajtur “Kisha e vogël”, janë gjetur të pajetë, dy persona, të cilët konstatohen se ishin vëllezër.
Bëhet me dije se sipas njoftimit zyrtar të Policisë së Korçës, janë gjetur të vrarë me armë zjarri dy vëllezërit Andrea Olldashi 33 vjeç dhe Martin Olldashi 31 vjeç.
Mësohet se viktimat ishin banues në Pogradec dhe ishin larguar nga banesa e tyre që prej mbrëmjes së datës 07.12.2020.
Policia dhe grupi hetimor kanë shkuar në vendngjarje duke bërë edhe krehjen e zonës, si dhe po punojnë për zbardhje e plotë të ngjarjes.
Njoftimi i Policisë:
Maliq/Informacion paraprak
Më datë 10.12.2020, rreth orës 11:50, në fshatin Zvirinë, në afërsi të vendit të quajtur “Kisha e vogël”, janë gjetur të pajetë, trupat e vëllezërve A. O., 33 vjeç dhe M. O., 31 vjeç, banues në Pogradec, të cilët dyshohet të kenë humbur jetën si pasojë e përdorimit të armës së zjarrit. Këta shtetas, ishin larguar nga banesa e tyre që prej mbrëmjes së datës 07.12.2020.
Në lidhje me këtë ngjarje menjëherë është ngritur një grup i posaçëm hetimor, me ekspertët më të mirë të Policisë Kriminale të strukturave hetimore në Drejtorinë Vendore të Policisë Korçë, nën drejtimin e Prokurorisë të Rrethit Gjyqësor Korçë.
Forcat Operacionale të DVP Korçë, në bashkëpunim me Komisariatin e Policisë Maliq, janë duke krehur zonën, gjithashtu janë shoqëruar në Polici disa persona për t’u marrë në pyetje nëse kanë dijeni apo jo në lidhje me këtë ngjarje.
Po ndiqet itinerari i lëvizjeve dhe po kryhen një sërë veprimesh hetimore për sqarimin e plotë të rrethanave të kësaj ngjarjeje si edhe kapjen e vënien përpara përgjegjësisë ligjore të autorëve./Gazetareforma.com/
