Zbardhet ekspertiza mjeko-ligjore për vdekjen e 25-vjeçarit Klodian Rasha. Mësohet se sipas ekspertizës, efektivi i policisë ka shkrepur dy herë armën e tij për të qëlluar drejt 25-vjeçarit, por njëri prej tyre nuk e ka kapur fare.
Ndërsa plumbi tjetër e ka kapur në shpatull. Sipas ekspertizës rezulton se plumbi i ka prekur organet jetike, duke i marrë edhe jetën.
Ndërkohë pritet edne që të dalë ekspertiza për gjurmët datiloskopike të armës që është gjetur 100 m larg vendit të ngjarjes, gjë që u pretendua se ishte e 25-vjeçarit.
Hetimet do të tregojnë nëse ajo armë ka gjurmë të të riut apo jo.
25-vjeçari Klodian Rasha u vra nga një efektiv policie në zonën e Laprakës, në rrugën “Dritan Hoxha” rreth orës 01:45 të mëngjesit, ndërsa efektivi Nevaldo Hadëraj është prangosur 12 orë më pas.
Polici ishte duke patrulluar në Laprakë, kur ka pikasur të riun i cili ishte duke lëvizur përtej afatit të lejuar nga autoritetet dhe i ka kërkuar të ndalojë.
I riu nuk ka pranuar dhe polici e ka ndjekur të riun, e ka qëlluar duke e plagosur me dy plumba, një në kokë dhe një në shpatull. Klodian Rasha ka ndërruar jetë në spital ndërsa familja mohoi ekzistencën e një arme në dorën e tij.
Ky krim ka hapur një valë reagimesh në të gjithë vendin dhe vetëm sot janë mbajtur dy protesta masive. Që nga ora 16:00 vendi ka qenë në flakë për Rashën.
/GazetaReforma.com/
