Politika është futur padashur edhe në eliminatorët e botërorit të futbollit që do të mbahet pas dy vjetësh në Katar.
Shorti i mbrëmshëm bëri që Kosova dhe Spanja të binin në një grup të dyja, por ajo që u duk krejt normale në fillim, bëri që ma pas të vijë një skandal diplomatik.
Spanja është një prej pesë shteteve të BE-së që nuk e njeh si shtet të pavarur Republikën e Kosovës, dhe kjo gjë ka sjellë edhe reagimin e qeverisë spanjolle në lidhje me “incidentin” e shortit që ka caktuar tashmë FIFA.
Ministrja e Jashtme e Spanjës, Arancha González Laya, ka ndërhyrë për një çështje ngërçi që është krijuar në sport, pasi vendi i saj do të përballet në kualifikueset e botërorit 2022 me Kosovën.
Arancha González Laya ka konfirmuar se, Spanja nuk e njeh ende Kosovën si shtet të pavarur, por kjo s’do të thotë se nuk do të luajë me të.
Ajo garanton se, ndeshjet do të luhen sipas rregullave të vendosura nga FIFA, dhe duhet të punohet që tani për të gjetur zgjidhjen, se si dhe ku do të luhen dy sfidat.
“Këtu po luajmë sipas rregullave të FIFA. Spanja padyshim që nuk e njeh Kosovën si një shtet të pavarur, por kjo nuk do të thotë që Spanja nuk merr pjesë në turne në të cilat merr pjesë Kosova”,- tha ajo.
Duket se, Spanja do të negociojë me FIFA-n për ndeshjet me Kosovën, në mënyrë që të respektohen vendimet politike dhe sportive.
Sipas rregullit të FIFA-s, përfaqësueset që nuk duan të presin Kosovën në ‘shtëpitë’ e tyre, mund t’i luajnë në territore neutrale siç bëri Moldavia në Ligën e Kombeve, por vetëm duke e negociuar më parë edhe me vetë Kosovën.
Në Ligën e Kombeve, Kosova gjithashtu u përball edhe me Greqinë, por helenët pranuan që ndeshja me dardanët të luhej në Athinë, edhe pse nuk e njohin si shtet të pavarur.
/GazetaReforma.com/
