Sapo mediat sot kanë njoftuar ndarjen e parakohëshme nga jeta të botuesit dhe presidentit të “Fax News”, Kasem Hysenbelliut, si pasojë e koronavirusit, kanë nxituar të parët politikanët kryesorë të vendit të shprehin ngushëllimet.
Nga rrjetet sociale i pari Presidenti i Republikës, Ilir Meta, pastaj me radhë kreu i PD-së, Basha, ai i grupit parlamentar të PS-së, Balla, etj., u kanë shprehur familjarëve ngushëllimet për humbjen e botuesit Kasem Hysenbelliu.
Presidenti Meta ka shprehur trishtimin e tij për ndarjen para kohe nga jeta të Presidentit të “Fax News”, Kasem Hysenbelliu, i cili, sipas tij, u shua mëngjesin e sotëm pasi nuk mundi të fitojë dot betejën me koronavirusin.
Meta thotë se, në këto momente të vështira i gjendet pranë familjarëve, ndërsa shpreh solidaritet edhe për gazetarët e “Fax News” dhe “Faxweb.al”, të cilët i inkurajoi të vazhdojnë misionin dhe ëndrrën e lënë përgjysmë nga Presidenti Hysenbelliu.
Statusi i plotë i Presidentit të Republikës, Ilir Meta:
“Tronditës dhe i pabesueshëm lajmi për humbjen e parakohshme nga jeta të Kasem Hysenbelliu, Presidentit të “Fax News”, kësaj media të lirë, të pavarur e dinjitoze.
Në këto momente të vështira jam pranë nënës, bashkëshortes, fëmijëve, familjarëve, miqve, kolegëve e gazetarëve dhe ju shpreh ngushëllimet më të sinqerta për këtë humbje të pazëvendësueshme.
Solidaritet me të gjithë gazetarët e “Fax News” dhe Faxweb.al, të cilët i inkurajoj të vazhdojnë misionin dhe ëndrrën e lënë përgjysmë nga Presidenti Hysenbelliu, për të ndërtuar një media të lirë, zëri i çdo qytetari në nevojë dhe çdo kauze sociale, zëdhënëse e pakompromis e opinionit publik.
I paharruar kujtimi i Kasem Hysenbelliut!
U prehsh në paqen e merituar!”
/GazetaReforma.com/
