Studiuesit gjermanë kanë identifikuar disa qeliza të pazhvilluara të gjakut që mund të sinjalizojnë ndërlikimet e koagulimit (mpiksjes) tek të infektuarit me Covid-19.
Rastet me koronavirus të cilat janë potencialisht të rënda tashmë mund të zbulohen më herët.
Është ende e paqartë se pse shumë të infektuar nga Covid-19 kanë simptoma të lehta ose aspak simptoma, ndërkohë që të tjerë përjetojnë eksperienca të rënda, deri edhe në humbjen e jetës.
Tek pacientët me simptoma të rënda, mushkëritë shpesh inflamohen, dhe ndonjëherë preken gjithashtu edhe veshkat dhe zemra.
Gjaku shpesh mbingarkohet, gjë që mund të shkaktojë format e mpiksjes në mushkëri.
Tashmë, një ekip i përbërë nga studiues të universiteteve dhe instituteve kërkimore në Gjermaninë Veriore dhe Perëndimore si dhe nga Holanda fqinje, kanë zbuluar një tregues kyç në gjakun e pacientëve të infektuar nga Covid-19, një e dhënë e cila mund të jetë një shenjë e hershme paralajmëruese për rastet e rënda.
Në mostrat e gjakut, shkencëtarët e Fondacionit Kërkimor Gjerman “Precision Medicine in Chronic Inflammation Cluster of Excellence” gjetën qelizat pararendëse të trombociteve (pllakëzave të gjakut), të cilat mund të tregojnë probleme me mpiksjen e gjakut.
Si rregull, megakariocitet, të cilat kontribuojnë në prodhimin e trombociteve, gjenden në palcën e kockave.
Kur megakariocitet përfundojnë në gjak, ato mund të shfaqin probleme të ngjashme me mpiksjen, sipas këtij studimi.
Kjo mund të tregojë se këto qeliza të pazhvilluara shkaktojnë probleme të rrezikshme të mpiksjes.
“Së bashku me të dhëna të tjera, siç janë vlerat klinike laboratorike dhe matjet e sinjalizuesve inflamatorë, ishim në gjendje të krijonim një lloj ‘gjurme gishti’, një nënshkrim, të funksionimit të ndryshuar të këtyre qelizave dhe gjurmimin e tyre me kalimin e kohës”, tha mjekja Neha Mishra, pjesë e studiuesve në këtë studim të ri ndaj pacientëve me covid-19.
Gjetjet e këtij studimi u botuan në revistën shkencore “Imuniteti” nga një ekip ndërkombëtar kërkuesish nga universiteti Kiel, Qendra Mjekësore Universitare Schlesëig-Holstein dhe universitete në Bon, Këln, Lübeck, Tübingen dhe Nijmegen./GazetaReforma.com/
