Italia do ta ketë vaksinën anti-Covid në fillim të janarit 2021. Lajmi është konfirmuar nga Ministri i Shëndetësisë, Roberto Speranza në një fjalim para Senatit.
Speranza deklaroi se Italia ka në plan të bëjë një program falas vaksinimi masiv në popullatë në fillim të 2021, teksa premton se do të ketë fillimisht plot 202 milionë doza, por është në pritje të miratimit nga Agjencia Europiane e Barnave.
Sipas Speranzas, prioritet gjatë vaksinimit do të jenë punonjësit e kujdesit shëndetësor, të moshuarit dhe ata që jetojnë në azile të moshuarish.
”Më në fund ” shohim tokë”, kemi një rrugë të qartë për në një vend të sigur. Duket se nga janari do të kemi vaksinat e para ”,- tha Speranza.
Duket se Italia do të presë BE për të miratuar një nga vaksinat ndaj COVID-19, me të gjitha gjasat Pfizer dhe Moderna që do të shqyrtohen njëra në dhjetor, tjetra në janar.
Kujtojmë se vetëm pak kohë më parë ministri i jashtëm italian, Luigi Di Maio u zotua se sapo Italia të sigurojë vaksinën ndaj COVID-19, do e ndihmojë edhe Shqipërinë ta ketë shumë shpejt atë.
/GazetaReforma.com/
