Largimi i tij me urgjencë për në një spital të Stambollit me çarter të posaçëm, pasi ishte futur në një fazë kritike të sëmundjes virale, solli shqetësim të madh te tifozët e ekipit të tij dhe miqtë.
Por sot Skënder Gega e ka fituar ndeshjen më të rëndësishme të jetës së tij, atë që mposhti COVID-19 dhe arriti që të rikthehet në Shqipëri.
Gega rezultoi i prekur nga COVID-19 me 12 nëntor, pasi më herët kishte shfaqur shenja të virusit. Situata u përkeqësua duke bërë që trajneri i Kukësit, të nisej me urgjencë drejtë Turqisë më 25 nëntor, për një trajtim më të specializuar pasi virusi i kishte prekur mushkëritë.
Pas një terapie të gjatë, klubi Verilindor njoftoi se trajneri Gega, ka lënë këtë të mërkurë ambientin e spitalit në Turqi për t’u rikthyer në Shqipëri.
“Duke parë ecurinë pozitive, efektin dhe rezultatet pozitive të terapisë, doktorët kanë dalë në konkluzion falë dhe progresit pozitiv që ka qenë shumë i shpejtë, duke rregulluar të gjitha parametrat, është lejuar të fluturojë drejt Tiranës.
Gega gëzon një gjendje të mirë shëndetësore dhe shumë shpejt do të bashkohet me ekipin e Kukësit, këtë herë për ti drejtuar nga fusha.
Ky është një lajm fantastik jo vetëm për klubin verilindorë por për të gjithë sportdashësit, fansat e Gegës dhe miqtë e tij, trajneri rikthehet në atdhe pasi fitoi betejën e tij më të madhe”.
/GazetaReforma.com/
