Kryetari i Partisë Demokratike Lulzim Basha ka vijuar takimet me tregtarët e Shkodrës, ku është njohur nga afër me problematikat dhe sfidat që kalojnë ata.
Në fjalën e tij, ai u ndal tek protesta e 16 shkurtit dhe theksoi se kjo datë do t’i rikthejë pushtetin vendit dhe jo partive që kanë interesa thjesht personale.
Basha ftoi të gjithë qytetarët që të bëhen bashkë për të luftuar keq-qeverisjen e vendit, e cila sipas tij, po varfëron çdo ditë e më tepër shqiptarët.
Bashkëbisedim me tregtarët:
Lumturia, tregtare: As sefte skam bërë.
Basha: Sa kohë ke që punon këtu?
Lumturia, tregtare: Tre vjet jam për sevap. Bashkëshortin e kam në kemp, fëmijët pa punë. Duan të ikin. Kemi ditë punojmë shumë pak. Ishin në Gjermani u kthyen dhe e kemi peshqesh prej Edi Ramës.
Basha: Këta mendojnë vetëm për veten e tyre. Popullin e kanë harruar vetëm i marrin taksat.
Lumturia, tregtare: Me pension vetëm hamë bukë. Ku të paguaj dritat? Ujin? Si të jetoj me 127 mijë lek? I kam lexuar të gjitha në gazetë. Unë s’ia jap votën PS-së sa të kem jetën.
Basha: E kemi në dorën tonë ta ndryshojmë. Shkodra, ti Lumturi dhe Shqipëria keni shpresë. Mjafton të bëhemi të gjithë bashkë dhe të merrni fatin tuaj në duart tuaja. Kjo është ftesa për 16 shkurtin. Më 16 shkurt të bëjmë një betejë që të rikthejmë një qeverisje që mendon për vendin dhe jo për veten.
