Grabitja e filialit të një banke të nivelit të dytë në qytetin e Tepelenës këtë pasdite ka qenë padyshim diçka e papritur për qytetarët dhe sidomos për policinë.
Sipas burimeve nga policia ka qenë vetëm një person, i cili ka kryer aktin dhe ende nuk është arrestuar askush.
Kanë kaluar rreth tre orë nga ngjarja dhe policia ka dalë një reagim të dytë ku thotë se tashmë e ka identifikuar hajdutin, megjithatë nuk mund ta zbulojnë identitetin për shkak të sekretit hetimor.
Sipas njoftimit, policia është venë në ndjekje të autorit dhe është duke përdorur të gjitha metodat për kapjen e tij.
Njoftimi i plotë i policisë
Në vijim të informacionit për vjedhjen me armë në një filial të një banke të nivelit të dytë në qytetin e Tepelenës, ju informojmë se: Falë reagimit të shpejtë dhe profesional të Drejtorisë Vendore të Policisë Gjirokastër dhe Policisë lokale, në kohë reale është bërë i mundur identifikimi i autorit të dyshuar të vjedhjes me armë.
Për arsye hetimi nuk bëhen me dije gjeneralitet. Policia është vënë në ndjekje të autorit, duke përdorur të gjitha format e metodat operacionale dhe hetimore për të bërë të mundur kapjen e tij.
