Prej disa javësh kryeqyteti ynë, Tiranë është zhytur në një kaos të madh trafiku ku në disa orë të ditës qarkullimi thuajse paralizohet dhe rrugët bllokohen totalisht.
Kjo gjë sipas ekspertëve të trafikut ka lidhje me bllokimin e arterjeve kryesore të trafikut siç janë rruga e Durrësit, apo sheshi ‘Skenderbej’, si edhe punimet që po ndodhin në rreth-rrotullimin e sheshit “Shqiponja”.
Por në lidhje me këtë të fundit, ku nga autoritetet e Policisë Rrugore është deklaruar bllokimi për të paktën 4 muaj, vjen një lajm kontradiktor.
Kryeministri i vendit, Edi Rama, ka publikuar sot pamje nga kantieri i “Sheshit Shqiponja” ku po zhvillohen punimet.
Ai thotë se, në këtë kantier po punohet 24 orë për të ndërtuar rrugën që do të lehtësojë qarkullimin e makinave, e cila është një nyjë lidhëse e kryeqytetit.
Kryeministri shkruan se, deri më tani kanë përfunduar 42% e punimeve.
“Mirëmëngjes dhe me këto pamje nga zemra e ‘Shqiponjës’, ku po hapen ditë-natë arteriet që do lehtësojnë ndjeshëm qarkullimin në hyrje të Tiranës, si edhe do t’i japin një pamje spektakolare portës hyrëse të kryeqytetit të Shqipërisë, ju uroj një ditë të mbarë”,- shkruan Rama.
/GazetaReforma.com/
