Në të gjithë Tiranën llogariten 300 nxënës e 130 mësues të prekur me koronavirus, ndërsa disa shkolla në Tiranë janë kthyer në vatra infeksioni, deklaron ish-deputetja e PD-së, Albana Vokshi
Vokshi shpreh shqetësimin se situata në shkolla për shkak të pandemisë së koronavirusit ka dalë jashtë kontrollit.
Në një intervistë televizive, dhënë mbrëmjen e sotme, Vokshi renditi dhe rastet shkollave të cilat janë vatra infeksioni në Tiranë.
“Në kopshtin nr 8 janë 9 mësues e 3 sanitare të prekur me covid, dhe kopshti ende është i hapur. Tek “Petro Nini” janë 10 mësuese, por dhe drejtues të shkollës të prekur me covid. “Sami Frashëri” sot ka 150 nxënës të karantinuar dhe 20 mësues . “Vasil Shanto” vetëm në një klasë janë 10 nxënës të karantinuar. “Fan Noli” ka 5 mësues e 20 nxënës të karantinuar. Ndërsa në të gjithë vendin kanë humbur jetën 10 mësues.
Vokshi nënvizon se nëse do të ishte bërë testimi periodik një pjesë e këtyre mësuesve sot nuk do të kishin humbur jetën.
Dy ditë më parë në një deklaratë për shtyp, Partia demokratike deklaroi se “Qeveria ende nuk ka marrë asnjë masë reale për mbrojtjen minimale të mësuesve dhe nxënësve në shkolla. Shkollat janë sot ndër vatrat më të rrezikshme të përhapjes së infeksionit, sepse qeveria nuk do t’ia dijë për shëndetin e nxënësve dhe mësuesve”.
PD jep edhe disa shifra të prekjes së mësuesve dhe nxënësve nga Covid-19:
– Shkollat në Tiranë: në dy ditët e fundit janë 280 nxënës, rreth 120 mësues të prekur ose karantinuar.
– Vetëm në Korçë janë mbi 100 mësues të prekur me COVID19
– Vetëm në 3 shkolla në Lezhë janë 20 mësues.
– Në të gjithë vendin janë rreth rreth 600 mësues prekur / karantinuar dhe mbi 1300 nxënës”
/GazetaReforma.com/
