Shqipëria ka nënshkruar kontratë për marrjen e vaksinës anti-covid vetëm për të mbuluar 20% të popullsisë. Kjo shifër, sipas ish deputetit dhe mjekut Tritan Shehu është e ulët dhe e krahasueshme me vendet afrikane.
Shehu deklaroi se Shqipëria duhet të rregulloj marrëveshjen me agjencinë Covax, pasi ajo mbulon vaksinimin për vetëm 20 % e popullsisë deri në fund të 2021.
“Qeveria shqiptare nuk ka kontraktuar me kompaninë prodhuese, as me BE, as me organizma botërore siç është Banka Botërore ,siç ka bërë Kosova që ka marrë kredi dhe i kërkon BB qe të sigurojë vaksinën njësoj si vendet e tjera të zhvilluara. Kurse Shqipëria na ka futur në një kategori që është për vendet e prapambetura. Covax është një agjenci që ka lidhje me OBSH, e cila është në favor për vendet e pazhvilluara. Janë të gjitha vendet afrikane dhe vendet e pazhvilluara. Por Covax merr përsipër vetëm për 20 % të popullsisë deri në fund të 2021. Shqipëria futet në grupim e vendeve afrikane dhe kjo është shumë e rëndë”, tha Shehu në një intervistë televizive.
Shehu theksoi se qeveria duhet të përpiqet ta zgjidhë brenda pak javësh këtë kontratë, ndryshe do mbajë një përgjegjësi historike për këtë.
/GazetaReforma.com/
