Ditën e djeshme Kombëtarja jonë fitoi në stadiumin “Air Albania” ndaj Kazakistanit me rezultatin 3-1.
Goli i parë i Shqipërisë erdhi në minutën e 16-të dhe u “gatua” nga dy futbollistët më ekspertë që ishin në fushë. Krosim perfekt i Memushajt dhe Cikalleshi bëri një goditje të saktë me kokë duke mposhtur portierin kazak.
Nuk kaluan shumë minuta dhe kuqezinjtë gjetën edhe golin e dytë me mbrojtësin Ardjan Ismajli që në minutën e 23-të përfitoi nga një top i mbetur në zonë, dhe realizoi golin e tij të parë me fanellën e kombëtares. Por festa e avantazhit të dyfishtë nuk zgjati aspak sepse me nisjen e topit Abiken përfitoi nga dalja e Berishës dhe një goditje direkte nga mesi i fushës realizoi një gol spektakolar.
Shqipëria iu afrua golit të 3-të në dy raste me Myrto Uzunin që shpërdoroi shumë para porte. Gjithsesi kuqezinjtë e gjetën golin e 3-të dhe atë të sigurisë në minutën e 61-të me një penallti të fituar nga Abrashi dhe të kthyer në gol nga Rey Manaj.
Tani Shqipërisë i duhet të përballet me Bjellorusinë e cila për momentin kryeson grupin me 10 pikë. Kuqezinjtë të mërkurën në orën 16:00 luajnë kundër bjellorusëve me një qëllim të vetëm, FITOREN.
Kjo ndeshje ka shumë rëndësi për kuqezinjtë e Rejës të cilët duhet të fitojnë me patjetër pasi kjo ndeshje sjell shumë benefite jo vetëm Kombëtares si ekip por edhe vetë Federatës së Futbollit.
Një fitore të mërkurën sjell kualifikimin direkt për në çerekfinalet e Ligës së Kombeve. Por jo vetëm kaq pasi fituesi i grupit, pra vendi i parë sjell 1.125 milionë euro shpërblim për FSHF-në, njësoj sa shifra e pjesëmarrjes në këtë ligë. Së dyti, vendi i parë e ngjit Shqipërinë në Ligën B për edicionin e ardhshëm, me skuadra edhe më të forta, me më tepër të ardhura etj. Së treti, vendi i parë i jep Shqipërisë shanset për t’u ngjitur një vazo më lart referuar kualifikueseve për Botërorin 2022, bazuar edhe në renditjen e përfaqësueseve europiane me kriter pikërisht ecurinë në Ligën e Kombeve.
Nëse me Kazakistanin luajtëm mirë dhe shënuam tani duhet të luajmë shumë mirë dhe të shënojmë për të fituar pas kjo fitore vlen shumë për të gjithë.
