Covid-19 ka marrë jetën të një tjetër intelektuali në Shqipëri.
Bëhet fjalë për shkrimtarin, poetin dhe mësuesin Ylli Xhaferri, i cili ka qenë ish-mësues letërsie në disa shkolla, përfshirë edhe Medresenë e Tiranës, si dhe ish-drejtor i gjimnazit të Rrogozhinës “Haxhi Qehaj”.
Mësohet se shkrimtari ka humbur jetën pas infektimit nga Covid-19 dhe pas disa ditësh i shtruar në spitalin Covid1 i njohur ndryshe si Spitali Infektiv.
Lajmi fillimisht e ka bërë të ditur vetë stafi i shkollës “Haxhi Qehaj”, të cilët kanë përcjellë mesazhe ngushëllimi në rrjetet sociale.
Kujtojmë se 66-vjeçari Ylli Xhaferri ka lindur në Golem të Kavajës. Ai kreu fakultetin Histori-Filologji dega Gjuhe-Letërsi. Xhaferri punoi si mësues dhe për shumë vite drejtor në gjimnazin “Haxhi Qehaj”.
Ylli Xhaferri ka botuar shume libra ku mund të veçojmë “Ikja e Muzave” si dhe “Mbrëmjen e merr gjumi vonë” .
Ai gjithashtu ka mbajtur edhe postin e Drejtorit të Drejtorisë Arsimore të qarkut Tiranë./Iconstyle.al/
