Ndryshe nga sa pretendohej, kompania që ka marrë me koncesion ‘Rrugën e Kombit’, ndërtuar tre herë me taksat e shqiptarëve, nuk ka dalë me humbje por me fitim.
Kjo tregon se rruga që u konsiderua si pa shumë rëndësi dhe fillimisht u përfol si tepër e shtrenjtë nga qeveria socialiste, është përdorur mjaftueshëm nga shqiptarët e të dyja vendeve andej dhe këndej kufirit politik.
Të ardhurat e “Albanian Highëay Concession”, që menaxhon me koncesion rrugën e Kombit, për vitin 2019 ishin 10% më të larta se projeksioni.
Sipas të dhënave të Ministrisë së Financave, drejtorisë që monitoron kontratat koncesionare, të ardhurat e realizuara nga tarifat e përdoruesve të rrugës janë realizuar në më shumë se 1,4 miliardë lekë, ose 10% më e lartë se sa vlera e projektuar vjetore.
Në total, kompania arkëtoi 2 miliardë lekë në vitin 2019, nga të cilat 570 milionë lekë ishin subvencione nga buxheti i shtetit.
Kontrata e koncensionit në rrugën e Kombit nisi të zbatohej në vitin 2017, për një afat 30-vjeçar.
Në bazë të kontratës do të investohet nga koncensionari 5,3 miliardë lekë. Vlera e investimit pritet të mbulohet me arkëtimet që kompania ka realizuar që nga fillimi i aktivitetit deri në fund të këtij viti.
Investimet
Ministria e Financave bëri të ditur se, aktualisht projekti është në fazën e ndërtimit dhe të operimit. Ndërtimi për këtë projekt pritet të realizohet në katër vite (deri në vitin 2022).
Realizimi i punimeve të ndërtimit në mënyrë progresive, për vitin 2018 kanë qenë në masën 20%. Theksohet në raport se, për shkak të protestave kundër pagesës së tarifës së kalimit për përdorim të rrugës, të cilat çuan në shkatërrimin e sheshit të Pagesës (Toll Plaza), ky shesh doli për 6 muaj jashtë funksionit.
Deri në fund të vitit 2019, aty janë realizuar 48% e vlerës së përgjithshme të punimeve të ndërtimit, në mënyrë progresive.
“Aktualisht shoqëria koncesionare vazhdon të realizojë punimet e mirëmbajtjes së autostradës, ka përmirësuar nivelin e sigurisë në Tunelin e Thirrës, dhe ka rehabilituar elementë të autostradës”,- thuhet në raport.
Për vitin 2018, vlera e investimit e realizuar ka rezultuar rreth 17% e vlerës së përgjithshme së investimit.
Tarifa për kalimin e automjeteve në autostradën Milot-Morinë për autoveturat është 5 euro.
Për banorët e qarkut Kukës kjo tarifë është e reduktuar në 100 lekë me tvsh. Ndërsa për kamionët kjo pagesë është 22 euro.
Ecuria pas protestave
Në vitin 2018, për shkak të kundërshtimeve mbi tarifën e rrugës nga përdoruesit e rrugës si dhe nga banorët e qytetit të Kukësit, Sheshi i Pagesës (Toll Plaza) qëndroi për 6 muaj jashtë funksionit.
Megjithatë, për muajt operativ të ardhurat ishin më të larta se ato të parashikuara. Por Ministria e Financave thotë se, nga rakordimi vjetor për vitin 2018 raportohet se niveli i të ardhurave faktike ka rezultuar më i lartë se minimumi i të ardhurave të garantuara nga trafiku, si rrjedhojë në bazë të kontratës nga ky suficit i të ardhurave të realizuara Autoriteti Kontraktues ka pasur përfitimin duke bërë ndarjen e këtij suficiti me shoqërinë koncesionare në raportin 60 me 40.
Ndryshe nga sa pritej vënia e tarifës nuk e ka ulur qarkullimin në rrugën e Kombit përderisa arkëtimet nga trafiku janë rritur që kur nisi koncesioni.
Koncesioni financohet më së shumti nga shqiptarët e Kosovës të cilët nëpërmjet rrugës së Kombit udhëtojnë në Shqipëri për pushime gjatë fundjavave dhe sezonit të verës.
/Burimi: Monitor.al/Përshtati: GazetaReforma.com/
