Turqia duket se do të jetë epiqendra e radhës e sulmeve të reja terroriste, të cilat ishin sfumuar disi prej pandemisë së koronavirusit.
Lajmin e kanë bërë të ditura përfaqësitë diplomatike të SHBA-ve në këtë vend, duke i’u bëri thirrje qytetarëve amerikanë të bëjnë kujdes në vendet ku do të grumbullohen dhe të shmangin daljet në ndërtesa të mëdha apo dhe në qendrat tregtare.
Siç ndodh rëndom në këto raste kur ka sinjalizime për sulme terroriste, përfaqësuesit e Shteteve të Bashkuara në Turqi, kanë lëshuar një paralajmërim për qytetarët amerikanë ditën e sotme.
Sipas mediave turke, SHBA-të kanë sinjalizuar shërbimet partnere të Turqisë, pasi kanë pasur të dhëna për një sulm terrorist në Stamboll, ose në një qytet tjetër turk.
“Misioni i SHBA-ve mori raporte të besueshme për sulme të mundshme terroriste dhe rrëmbime të shtetasve amerikanë në Stamboll”,- thuhet në njoftimin e lëshuar ditën e sotme.
Sinjalizimi me mesazh, që i’u drejtohej kryesisht shtetasve amerikanë, u bënte thirrje që të bënin kujdes në vendet ku do të grumbullohen.
Sipas njoftimit, ata duhet të shmangin daljet në ndërtesa të mëdha, apo dhe në qendrat tregtare. Ndërsa Departamenti i Shtetit nuk ka dhënë detaje të mëtejshme dhe informacione mbi kërcënimin.
/Burimi: BBC/GazetaReforma.com/
