Pas pjesëmarrjes së 424 kandidatëve në Testin e Arsyetimit Logjik, ku u kualifikuan 403 të tillë, pjesëtarët kandidatë për tu bërë hetues në “FBI-në shqiptare”, BKH-në, kanë patur ditën e sotme Testin për Aftësitë Fizike.
Mësohet se nga 403 kandidatë testin fizik e kanë kaluar vetëm 103, ndërsa 300 të tjerë nuk janë kualifikuar në garën për hetues të BKH-së.
Komisioni i Përzgjedhjes në Byronë Kombëtare të Hetimit, ka njoftuar se ditën e sotme është mbyllur procesi i Testit për Aftësitë Fizike dhe përzgjedhjes së kandidatëve për fazat e mëtejshme të konkurrimit.
Po ashtu bëhet me dije se kandidatët e kualifikuar, do t’i nënshtrohen edhe testit të esesë me shkrim i cili do të zhvillohet në Pallatin e Kongreseve më datë 26.10.2020.
Kujtojmë se Testimi i Aftësive fizike u zhvillua nën vëzhgimin dhe monitorimin e Komisionit Ndërkombëtar të Ekspertëve, të caktuar nga misionet e Qeverisë së Shteteve të Bashkuara të Amerikës dhe Bashkimit Europian në Shqipëri./GazetaReforma.com/
