Naftëtarët e Ballshit prej më shumë se një viti vijojnë të kenë Uzinën e përpunimit të naftës të mbyllur, dhe gjenden pa mundësinë për të punuar. Për më tepër, kanë dhjetëra muaj rroga të pamarra.
Kompania private që e zotëron, Allum Enterprises, ua dha dy kompanive të tjera në përdorim, Tosk Energji dhe Bylis Energji. Këto dy të fundit dështuan dhe nuk u dhanë rrogat naftëtarëve, që tani gjenden edhe në grevë urie.
Teksa enden për të kërkuar të drejtën e tyre, ende nuk kanë marrë asnjë kokërr leku për të mbajtur familjet e tyre.
Kompania private nuk i dëgjon
Ata gjenden të braktisur nga kompania me të cilën kishin kontratën e punës. Pronarët janë larguar nga Uzina, dhe për naftëtarët nuk ka asnjë rrogë.
Edhe pse çështja tashmë ka marrë përmasa kombëtare e më gjerë, ata nuk po e vënë ujin në zjarr, për të përmbushur detyrimet e tyre që i kanë ndaj naftëtarëve. Kompania Allum që zotëron 85% të kompanisë, nuk hap as dyert e Uzinës, teksa nuk paguan as pagat e naftëtarëve.
Roli i shtetit
Nga ana tjetër, shteti zotëron ende 15% të kapitalit. E vërtetë, është në minorancë dhe nuk ka fuqi vendimmarrëse, por a mund të pranohet ky si justifikim?
Edi Rama në konferencë për shtyp sot u shpreh tekstualisht se marrëdhënia e naftëtarëve me kompaninë është kapitaliste, dhe se shteti nuk i ka detyrime të drejtpërdrejta.
Por, në një sistem kapitalist kontratat kur firmosen, edhe ndiqen që të zbatohen. Edi Rama dhe qeveria e tij nuk mund të justifikohen me faktin që kompania është private, sepse nuk është bërë asnjë tentative për rishikim të kontratës, apo deri për anulim nëse privati nuk zbaton rregullat dhe detyrimet që ka.
Një rafineri që çdo vit e më shumë në borxhe, nuk mund të vazhdojë punën si pa të keq, pa pasur ndërhyrje nga instancat shtetërore. Asnjë kompani e huaj, nuk është më e fuqishme se rregullat vendase, dhe normalisht që duhej ndërhyrje, madje vite më parë, sepse ky nuk është rasti i parë që naftëtarët mbeten pa paguar.
Pra, Edi Rama mund të shprehet se po bën çfarë ka mundësi për të komunikuar me kompaninë që të zgjidhi këtë krizë, por nuk mund të justifikohet duke u larguar nga përgjegjësitë. Kontratat kapitaliste duhen rishikuar, për t’u ardhur në ndihmë mijëra banorëve që atë rafineri e kanë burim kryesor të të ardhurave.
/GazetaReforma.com/
