Shtetasi 71 vjeçar, i quajtur Lefter Zhidru, po vazhdon ende të ‘luftojë’ me policinë due mos pranuar që të dorëzohet.
I moshuari ka më shumë se një orë që bën rezistencë ndaj forcave të policisë, duke qëlluar drejt tyre me kallash.
Policia ndërkohë ka zbardhur zanafillën e plotë të ngjarjes e cila nisi si një konflikt familjar, ku shtetasi Lefter Zhidru ishte konfliktuar me gruan e tij. Pas konfliktit gruaja ka telefonuar policinë. Menjëherë në vendin e ngjarjes kanë shkuar efektivët e Shqiponjave të cilët sapo kanë shkuar në derën e shtëpisë 71 vjeçarit, ai ka qëlluar befasisht me breshëri kallashnikovi.
Të gjendur në këto kushte, 4 efektivët e Shqiponjave kanë reaguar menjëherë dhe janë ngjitur në katin e tretë të pallatit, duke iu shpëtuar mrekullisht plumbave.
Më pas, ata kanë kërkuar ndihmë dhe tashmë prej më shumë se 30 minutash e gjithë zona është e rrethuar nga efektivët e Policisë Elbasan dhe një grup i FNSH-së. Tashmë në vendngjarje kanë shkuar dhe Forcat Speciale RENEA pasi prej momentit kur ka qëlluar në drejtim të Shqiponjave dhe deri në këto momente, 71 vjeçari Lefter Zhidru nuk ka reshtur së qëlluari nga dritarja e shtëpisë.
71 vjeçari duke qëlluar drejt efektivëve të policisë, ka plagosur edhe dy kalimtarë të rastit, të identifikuar si Ledio Saraçi 22 vjeç dhe Abdenauer Kodraxhiu, 21 vjeç.
Njoftimi i Policisë:
Elbasan/Informacion paraprak
Më datë 24.09.2020, rreth orës 13:20, në lagjen “11 Nëntori”, Elbasan shtetasja F. Zh., ka patur një konflikt me bashkëshortin e saj, shtetasin Lefter Zhidru, 71 vjeç, i cili në momentin që ka shkuar Policia është futur në banesë dhe ka qëlluar dhe vijon të qëllojë me armë zjarri kallash në drejtim të forcave të Policisë.
Forcat Shqiponja dhe Patrullat e Përgjithshme janë pozicionuar dhe kanë vendosur perimetrin e sigurisë dhe vijojnë t’i bëjnë thirrje këtij shtetasi të dorëzohet, i cili vijon të bëjë rezistencë duke qëlluar vazhdimisht në drejtim të Policisë.
Si pasojë e të shtënave janë plagosur jashtë rrezikut për jetën dy shtetas, L. S., 22 vjeç dhe A. K., 21 vjeç, kalimtarë të rastit, në momentin që ky shtetas ka filluar të qëllonte me armë në drejtim të Policisë.
Në ndihmë të Policisë lokale janë nisur menjëherë forcat e FNSH dhe të RENEA-s, për të bërë neutralizimin dhe kapjen e shtetasit që vijon të qëllojë me armë në drejtim të Policisë.
Shtetasi Lefter Zhidru vijon të qëllojë me armë duke bërë rezistencë edhe pas thirrjeve të pandërprera të Policisë.
Banesa nga e cila po qëllon ky shtetas është e rrethuar dhe Policia ka vendosur një perimetër të gjerë rrethimi, për të parandaluar dëmtimin e kalimtarëve të tjerë të rastit.
