Prej muajsh në vendin tonë është diskutuar gjatë deportimi i Harun Çelik, 42-vjeç nga Shqipëria në Turqi pasi akuzohej se ishte pjesë e mbështetësve të Fetullah Gulenit, personit që organizoi grushtin e shtetit nga Erdoganit.
I riu është kapur nga disa bashkëkombas që pretendojnë se punojnë për llogari të autoriteteve turke, pak pasi kishte dalë nga ambientet e burgut në rrugën ‘Mine Peza’.
Çelik u arrestua në muajin korrik në aeroportin e Rinasit teksa tentonte që të kalonte me vizë të falsifikuar drej Kanadasë dhe pas përballjes me Gjykatën, ndaj tij u vendos masa “arrest me burg”, për t’u liruar pas më shumë se 5 muajsh burgim.
Së fundmi, avokati i Popullit i ka dërguar një raport të plotë Policisë së Shtetit në lidhje me shkeljet që janë bërë për procedurat e dëbimit nga Shqipëria të shtetasit turk, Harun Çelik.
Në bazë të raportit të siguruar nga Dosja.al, mësohet se Avokati i Popullit ka gjetur shumë shkelje që janë bërë nga organet ligjzbatuese në vend, përfshirë dhe Policinë e Shtetit.
Dokumenti i është dorëzuar Ardi Veliut në 24 maj 2020, ku pasi bëhet një panoramë e qartë e asaj që ka ndodhur, Avokati i Popullit kërkon që të merren masa dhe të përqafohen disa rekomandime të tyre, ku ndër të tjera thuhet se shtetasit Harun Çelik i janë shkelur të drejtat, pasi atij nuk i është dhënë e drejta për azil.
“Ekzekutimi i menjëhershëm i urdhrit të dëbimit Nr. 2125, datë 01.01.2020 nuk gjen asnjë mbështetje ligjore. Në nenin 112 të ligjit përcaktohen procedurat dhe mënyrat se si bëhet ekzekutimi i urdhrit të dëbimit. Ekzekutimi i menjëheshëm i urdhrit të dëbimit lidhet në mënyrë të drejtpërdrejtë me kërcënimin për rendin dhe sigurinë publike kombëtare që vjen si pasojë e pranisë së të huajit në territorin e Republikës së Shqipërisë”, shtohet në raport.
Më tej shtohet se nga dokumentacionet dhe shpjegimet e dhëna nga drejtoria, nuk vërtetohet dhe as rezulton që të ketë ndonjë të dhënë se prania e Harun Çelik të ketë kërcënuar rendin dhe sigurinë publike. Po ashtu Avokati i Populli vëren se Çelik nuk ka pasur mundësi ankimi të urdhrit të tij të dëbimit dhe as të vendimit të gjykatës.
“Mohimi i të dretjës për t’iu drejtuar gjykatës dhe për të marrë një përgjigje përfundimtare prej saj për pretendimet e ngritura, përbën cenim të së drejtës themelorë për një proces të rregullt ligjor”, shkruan Avokati i Popullit.
Në fund Avokati i Popullit liston dhe disa rekomandime për Policinë e Shtetit dhe pret përgjigje brenda 30 ditëve për të gjitha shkeljet që ka gjetur nga hetimi.
Fakti që Shqipëria lejoi ekstradimin e tij, ndonëse Çelik kishte kërkuar azil politik ngjalli dyshime për një pjesë të audiences, teksa avokati i Çelik, Alban Bengasi, deklaroi asokohe se Shqipëria kishte refuzuar kërkesën e klientit të tij për azil politik.
Për më tepër ai shtoi se janë bërë veprime të jashtëligjshme rreth ekstradimit të tij në Turqi.
