Ka bërë jehonë denoncimi i një 17-vjeçareje nga Saranda, se një 72-vjeçar dhe 2 persona të tjerë kanë abuzuar me të, teksa deri tani shumë pak dihej rreth ngjarjes.
LEXO: I pranoi të gjitha në Polici: Pranga 72-vjeçarit, abuzoi seksualisht me një të mitur
Dy ditë me parë emisioni “Fiks Fare” publikoi video dhe regjistrime, që dëshmonin se babai i vajzës ka bashkëpunuar me persona të tjerë, mes të cilëve edhe 72-vjeçarin, për të kryer abuzime seksuale ndaj saj, madje në shtëpinë e tij.
Në një nga regjistrimet babai i vajzës njofton Policinë sepse dyshonte se i dashuri i 17-vjeçares, Denito Ruçi, ishte shumë afër më shtëpinë dhe mund të rrëmbente vajzën.
Pasi Policia vjen në banesë, prindërit e mbyllin vajzën brenda shtëpisë dhe nuk e lejojnë atë që t’i takojë ata vetëm, teksa vajza i përgjërohet policëve që ta dëgjojnë, por ata i thonë se nëse nuk pushon do ta dërgojnë në spital dhe se djalin do ta fusin në burg.
Kështu, policët zgjodhën të heshtin në një situatë të tillë, duke u bërë palë me abuzuesit.
Mirëpo, së fundmi, SHÇBA njofton në rrjetet sociale se ka referuar materialet në Prokurori për 3 punonjës policie në Komisariatin e Sarandës për “Shpërdorim detyre”, në ngarkim të punonjësve të policisë: Komisar S.B., Shef i Seksionit të Policimit në Komunitet në Komisariatin e Policisë Sarandë; N/Komisar R.I., Specialist për Dhunën në Familje dhe të Miturit, në Komisariatin e Policisë Sarandë; Inspektor B.N., SPZ në Komisariatin e Policisë Sarandë.
Kujtojmë se prindërit e vajzës jo vetëm që kanë bashkëpunuar me abuzuesit, por kanë dale edhe në media duke akuzuar vajzën dhe të dashurin e saj se po mashton.
Por, jo vetëm kaq, për më tepër, ata kanë paditur në polici të dashurin e saj, Denito Ruçi, të cilin e akuzojnë se e ka marrë me forcë vajzën e tyre dhe se ka qëllim ta trafikojë jashtë vendit, ndërsa i ati thotë se Ruçi ka qenë i akuzuar gjatë qëndrimit jashtë shtetit dhe për shkak të problemeve me ligjin i është dashur të ndërrojë edhe emrin.
