Koronavirusi vijon të përparojë ndjeshëm dhe deri tani ka shënuar 2,677,724 të infektuar dhe 187,541 viktima në 210 vende të botës.
Shpesh herë OBSH ka dhënë deklarata pesimiste rreth situatës në botë duke u shprehur se deri në krijimin e vaksinës do na duhet të bashkëjetojmë me Covid-19, teksa së fundmi paralajmëroi se situata nuk do të normalizohet së shpejti.
Pra, teoria e deritanishme e OBSH dhe e një pjese të ekspertëve është se për një periudhë kohore të pacaktuar, koronavirusi do kthehet në mënyrë jetese.
Në vijim të kësaj ideje, kreu i Urgjencës Kombëtare, Skënder Brataj, dha ditën e sotme disa këshilla të rëndësishme për qytetarët.
Në një komunikim live në “Facebook”, Brataj u tregoi qytetarëve se çfarë duhet të kenë parasysh për këtë virus, që nga përdorimi i maskës dhe grumbullimi nëpër tregje.
“Ka simptoma shumë të ngjashme me gripin, por është më agresiv, sulmon në një kohë shumë të shkurtër një numër shumë të madh njerëzish. Nuk është tamam si gripi. Maska që ne përdorim, ato të thjeshtat, nuk të mbrojnë nga infektimi. Nëse unë jam bartës i sëmundjes, duhet të përdor maskën, për të mos infektuar të tjerët. Për t’u mbrojtur 100% nga të infektuarit, personeli shëndetëso përdorin maskat kirurgjikale. Koronavirusi nuk sheh në fytyrë askënd, i prek të gjithë. Infeksionin mund ta marrin të gjithë njësoj, por shfaqja e tij varet nga mosha, sëmundshmëria që mund të ketë secili”.
Më tej, numri 1 i Urgjencë tha:
- Nëse je në lëvizje, nuk je i sëmurë, nuk ka sens përdorimi i maskës.
- Maska duhet përdorur, kur je i infektuar, kur do të shkosh në një vend ku do të rrish në radhë, mund ta përdorësh.
- Koronavirusi nuk shkakton arrest kardiak të menjëhershëm.
- Nëse shihni dikë në rrugë duke u rrëzuar, duhet ta ndihmoni, të afroheni të paktën, ta pyesni, pasi të vini dorezat dhe maskën.
- Përdorni maska kirurgjikale.
Kujtojmë se në vendin tonë vijon të thellohet ndjeshëm numri i të prekurve nga koronavirusi dhe deri tani numërohen 663 të infektuar, teksa në 24 orët e fundit janë regjistruar 29 raste të reja.
