Ditën e djeshme, autoriteti doganor grek, sekuestroi në sasi prej më shumë se 10 mijë maskash mbrojtëse ndaj COVID-19, të cilat kishin si destinacion Shqipërinë.
Sipas “Top Channel”, maskat i përkisnin kompanisë greke “Sarantis Eebe” dhe sapo kamioni u paraqit në doganën e Pireut u blloka.
Autoritetet doganore njoftuan kompaninë eksportuese, se është i ndaluar me urdhër të veçantë, eksportimi i maskave dhe dezinfektantëve, me destinacion vendet e treta.
Dogana njoftoi gjithashtu kompaninë, se nëse ka sasi të tjera në depo, do të bllokohen dhe do t’i kalojnë shtetit grek, i cili do t’i shpërndajë nëpër spitale dhe farmaci, kundrejt pagesës
Janë të shumta kompanitë që kanë denoncuar këtë fenomen, pasi 30% e maskave dhe dezinfektantëve, sekuestrohen menjëherë sapo hyjnë në territorin grek.
Në Greqi numërohen mbi 700 të infektuar nga koronavirusi, mes të cilëve 20 janë viktima.
Ndërsa në vendin tonë, numri i të prekurve gjatë 24 orëve të fundit u rrit në 146, nga të cilët 17 janë të shëruar dhe 5 viktima.
