Bilanci nga Coronavirusi në vendin tonë është thelluar ndjeshëm, pasi brenda natës kanë ndërruar jetë 2 persona, duke e çuar në 4 numrin e viktimave ndërsa një 61-vjeçar ka pësuar vdekje klinike e tashmë ndodhet në gjendje të rëndë.
Sakaq, numri i të infektuarve sot ka shkuar në 104 persona, ndërkohë harta e të prekurve në vend sa vjen dhe zgjerohet, pasi janë shënuar të infektuar edhe në Vlorë e Shkodër.
Ditën e sotme, kryeministri Edi Rama dha një intervistë për News 24, ku foli rreth situatës aktuale teksa deklaroi se kjo është java vendimtare dhe më e vështira në Shqipëri.
Kështu, ai iu drejtua sërish shqiptarëve, duke iu kërkuar të zbatojnë masat, në mënyrë që të mos kemi shifra stratosferike të të infektuarve dhe të viktimave dhe theksoi edhe një herë se 80% e të infektuarve as do ta kuptojnë fare, por 20% prej tyre do të luftojnë me vdekjen në spital.
Pjesë nga intervista:
Çfarë iu shqetëson më shumë në këto orë të fundit?
Nuk ka asnjë befasi, surprizë, sekret, që situate do të shkojë duke u rënduar, pasi e dimë shumë mirë, bazuar nga vendet e tjera. E kemi prezantuar disa herë atë kurbën e famshme, që është dicka që na bashkon me të gjitha eksperiencat e realitetet e tjera, që tregon se ka ende njerëz që s’e kanë kuptuar. Virusi do të përhapet, do të prekë shumicën prej nesh, por masat shtrënguese ngadalësojnë përhapjen e tij dhe i japin mundësi sistemit shëndetësorë të kurojnë ata që preken më rëndë. Ne e dimë që 80% as do ta ndjejnë fare, por 20% i 20% të mbetur do të luftojnë me vdekjen. Që këta të marrin shërbimin e duhur, duhet që ne të tjerët të rrimë sa më shumë mbyllur në shtëpi dhe të zbatojmë rregullat e thjeshta, sepse nuk kemi asnjë armë tjetër. Java që kemi hyrë është e parashikuar, nuk kemi hedhur fall, bazuar mbi modelin statistikor të përbotshëm. Është javë vendimtare për të mos lejuar që shifrat të shkojnë në stratosferë.
