Jo të gjithë mund ta kuptojmë nëse jemi të infektuar nga Coronavirusi dhe ky tashmë është një fakt i bërë me dije nga studime, autoritete të ndryshme mjekësore, madje edhe nga OBSH.
Mund të ndodhë që një person i infektuar mos ta mësojë kurrë këtë gjë, pasi virusi jo gjithmonë shfaq simptoma.
Nga një studim i Universitetit të Kolumbias ka rezultuar se 86 për qind e të infektuarve janë duke e vazhduar jetën normalisht pa “rënë në sy” se janë prekur nga COVID-19.
Jeffrey Shaman, studius, është shprehur se janë rastet e paidentifikuara ato që po e furnizojnë përhapjen e COVID-19.
“Shumica e këtyre rasteve kanë pasur simptoma të buta ose nuk kanë pasur fare. Njerëzit mund të mos e kuptojnë fare. Ose mund të mendojnë se kanë ndonjë ftohje.”
Duke përdorur programe të posaçme, studiuesit arritën që të gjurmonin rastet e infeksioneve para dhe pasi qyteti i Wuhan-it të izolohej dhe arritën në përfundimin se këto të infektuarit pa simptoma apo me simptoma të buta, të njohura si raste të fshehta, ishin pas dy të tretave të pacientëve të raportuar.
Kjo është edhe arsyeja përse Organizata Botërore e Shëndetësisë u ka bërë thirrje të gjitha vendeve të prekura që të përmirësojnë programet e tyre të testimit pasi kjo është mënyra më e mirë për të ngadalësuar përhapjen e pandemisë së Coronavirusit.
Për të lexuar me shumë rreth transmetimit të Coronavirusit nga njerëzit që nuk shfaqin simptoma dhe deri tek persona e infektuar në gjendje të rëndë klikoni në linkun e mëposhtëm:
Sa është shpejtësia e transmetimit të Coronavirusit nëpërmjet njerëzve?
Në rang botëror deri tani janë shënuar 7,531 viktima dhe janë regjistruar mbi 194 ,000 të infektuar në 163 shtete, ndërsa në vendin tonë deri tani ka humbur jetën 1 person dhe janë infektuar 55 të tjerë, teksa në Kosovë janë 19 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
