Këtë të hënë në SHBA nisi të testohet vaksina e parë kundër Coronavirusit, me të cilën synohet të luftohet virusi vdekjeprurës.
Së fundmi, është kryer testimi i parë te një vullnetare, e cila është 43-vjeçarja Jennifer Haller, nënë e dy fëmijëve.
Ajo është injektuar sot me vaksinën me emrin “mRNA-127” e krijuar nga kompania amerikane “Moderna Inc”.
“Ndjehem shumë mire.Jam e lumtur që jam bërë pjesë e diçkaje kaq të madhe.”- ishin fjalët e para të saj pasi u injektua me vaksinën
Megjithatë, kjo nuk është vaksina e parë, qindra kompani në SHBA dhe botë po punojnë për zhvillimin e një vaksine që do të luftojë Coronavirusin.
Vaksina do testohet edhe te vullnetarët e tjerë për të parë rezultatet, përpara se të jetë e gatshme për t’u përdorur te pacientët me Covid-19, çka mund të kërkojë nga 8 muaj deri në 1 vit kohë.
Në rang botëror deri tani janë shënuar 7,074 viktima dhe janë regjistruar 179,829 të infektuar në 162 shtete, ndërsa në vendin tonë deri tani ka humbur jetën 1 person dhe janë infektuar 51 të tjerë, teksa në Kosovë janë 15 persona të infektuar me COVID-19.
Autoritetet shëndetësore bëjnë thirrje që personat të cilët mund të kenë qenë të ekspozuar ndaj individëve të dyshuar për COVID-19, duhet që të vetëkarantinohen dhe të monitorojnë shëndetin e tyre për 14 ditë, që nga dita e fundit me kontaktin e mundshëm.
Po ashtu, ata duhet të kërkojnë mbikëqyrje të menjëhershme mjekësore, nëse paraqesin ndonjë nga simptomat, veçanërisht temperaturë, simptoma respiratore si kollë dhe vështirësi në frymëmarrje apo diarre menjëherë të kontaktojnë 127.
Të gjithë qytetarët rekomandohet që të shmangin daljet në publik dhe të qëndrojnë në shtëpi duke respektuar rregullat e higjenës.
