Një 72-vjeçare ka ndërruar jetë në Qendrën Shëndetësore të Mamurrasit në Kurbin mbrëmjen e kaluar.
E moshuara u paraqit në gjendje të rënduar shëndetësore me shenja gripale.
Ka dyshime se e moshuara ishte e prekur nga koronavirusi, ndërsa pritet përgjigja e analizave.
Ndërkohë një javë më parë një 50-vjeçare ndërroi jetë në spitalin e Korçës.
Fillimisht u dyshua për koronavirus, por Ministria e Shëndetësisë konfirmoi se gruaja kishte edemë pulmonare.
Gjithashtu një edukatore kopështi, e cila dyshohej se ishte infektuar me koronavirus ndërroi jetë më 3 mars.
Aktualisht në vendin tonë janë shënuar 23 të infektuar një viktimë nga koronavirusi.
Viktima ishte një 73- vjeçare në Durrës, e cila vuante nga disa sëmundje kronike.
Ndërkohë nga 23 të prekurit, 5 ndodhen në repartin e Infektivit, ndërsa 18 të tjerët janë vetëkarantinuar në shtëpi.
Gjendja shëndetësore e të gjithë të prekurve është e stabilizuar.
Qeveria ndërkohë ka marrë një sërë masash për të parandaluar përhapjen e koronavirusit.
Që nga dita e djeshme në rrugë ka zbritur ushtria dhe policia, për të evidentuar personat që thyejnë rregullat e vetëkarantinimit.
Gjithashtu që prej ditës së nesërme në orën 6 të mëngjesit deri mesnatën e të dielës, qarkullimi i makinave private do të ndërpritet.
