Ditën e djeshme presidenti Ilir Meta i dërgoi një letër Komisionerit për Zgjerim në BE, Oliver Varhelyi, ku thuhej se në Shqipëri ka krizë politike.
Në lidhje me këtë veprim të Metës ka reaguar në Twitter kryeministri Edi Rama.
Kreu i qeverisë shkruan, se për herë të parë që nga krijimi i BE-së, një president çon letra në Bruksel, për të minuar rrugën mes Europës dhe vendit të tij.
Sipas Ramës, për herë të parë një vend kandidat ka Brukselin pro dhe kundër presidentin e vendit.
Kryeministri shkruan më tej, se këto përpjekje për bojkot, kanë ardhur pas nisjes së Reformës në Drejtësi.
Postimi i Ramës në Twitter
Për herë të parë që nga krijimi i Bashkimit Europian një president çon letra në Bruksel për të minuar urën mes Europës e vendit të tij! Për herë të parë në historinë e zgjerimit të BE një vend kandidat ka Brukselin PRO dhe Presidentin e vet KUNDËR vendit e KUNDËR vetë Brukselit..
Sa nisi terapia intensive e Reformës në Drejtësi nisi dhe reaksioni me temperatura të larta në organizmin e shtetit të sëmurë prej kancerit të korrupsionit! Përpëlitjet e ethshme me bojkote, molotovë, dekrete janë thjesht pasoja të intensitetit të terapisë mbi kancerin..
Shqipëria mund ta marrë mund të mos e marrë PO-në që meriton nga Këshilli Europian, po ama kurimi deri në fund i sëmundjes dërrmuese që i ka ngrënë trupin e shpirtin prej 30 vjetësh,as mund dhe as do ndalet dot me kriza të turpshme të provokuara nga terapia e Reformës në Drejtësi!
Në letrën e dërguar Komisionerit për Zgjerim nga Meta, thuhej se kriza ka ardhur si pasojë e përpjekjes së qeverisë për të kapur Gjykatën Kushtetuese.
Më tej Meta shkruante, se qeveria ka përfituar edhe nga mbështetja e BE, për të miratuar ligje anti-kushtetuese.
