4 shqiptarë janë arrestuar në Spanjë së fundmi, pasi kishin kryer një sërë grabitjesh në shumë banesa në disa provinca në Madrid.
Banda kishte ngjallur shqetësim tek banorët, të cilët ishin ankuar në policia, ndërsa grabitjet e tyre janë kryer gjatë periudhës kohore 15-23 shkurt të këtij viti.
Shqiptarët akuzohen për rreth njëzet vepra kriminale në Madrid, në Toledo, Teruel, Huesca, Navarra dhe provincën e Jienense.
Sipas mediave spanjolle, anëtarët e kësaj organizate kishin krijuar një grup të strukturuar dhe ishin bërë ekspertë të vjedhjeve.
Autoritetet vendase njoftojnë se grabitësit jetonin në banesa të vogla dhe modeste për të mos tërhequr vëmendje.
Mësohet se hetimet fillimisht nisën në Madrid, ku edhe u zbulua prania e grupit dhe në fillim të shkurtit, efektivët zbuluan se banda ishte transferuar në Andaluzi, konkretisht në provincën e Jaén, ku ata kryen disa vepra kriminale në Villanueva de la Reina, Los Villares, Andújar ose Linares.
Gjatë operacionit, policia ka sekuestruar sendet e vlefshme si bizhuteri floriri, orë, pajisje kompjuterike dhe elektrike, dokumente të rreme, targa të falsifikuara dhe mjetet për hapjen e dyerve të banesave që vidhnin.
Nga të dhënat e policisë, të arrestuarit janë mes moshës 35 deri në 40 vjeç dhe ishin të pajisur me dokumente qëndrimi në shtetin spanjoll.
Tashmë ata janë lënë në paraburgim deri në zbardhjen e plotë të hetimeve, ndërsa më poshtë mund të ndiqni aksionin e policisë spanjolle.
