Prezenca e OSBE në Shqipëri organizoi sot një tryezë për reformën zgjedhore.
Pjesë e tryezës ishin përfaqësuesit e partive politike brenda dhe jashtë parlamentit, përfaqësuesit e shteteve pjesëmarrëse të OSBE dhe organizatave ndërkombëtare.
Pas takimit, Borchardt tha për mediat, se diskutimet ishin konstruktive.
Ai zbuloi se gjatë takimit u fol për depolitizimin e administratës zgjedhore dhe ndryshimin e sistemit dhe rolin e medias në fushatën zgjedhore.
Pjesë nga intervista me Borchardt
Si ishin diskutimet sot?
Shumë konstruktive, në pikëpamjen tonë. Ne ftuam Shtetet pjesëmarrëse të OSBE-së dhe organizatat mike si Bashkimin Evropian, Këshillin e Evropës dhe Kombet e Bashkuara për t’u informuar më së miri për mendimet e partive të ndryshme të përfshira në reformën zgjedhore. Nga ana tjetër, donim t’i nxitnim negociuesit që të bëjnë kompromise. Prekëm disa çështje, me detaje, që nga depolitizimi i administratës zgjedhore te ndryshimi i sistemit zgjedhor, i cili nuk është ndër rekomandimet tona, deri te roli i medias në fushatën zgjedhore. Pra, në tërësi, u zhvillua një diskutim i gjerë dhe u fol për disa çështje, për të cilat ne do të vijojmë të flasim dhe të bëjmë rekomandime.
Si e shihni propozimin e Partisë Demokratike për të pezulluar procesin e vettingut për anëtarët e Kolegjit Zgjedhor?
Kjo çështje është ende duke u diskutuar dhe ne dërguam një mesazh të qartë se ata duhet të respektojnë dispozitën e Kushtetutës.
E konsideroni të përshtatshme shtyrjen e reformës pas 15 marsit?
Gjithçka që është në përputhje me Kushtetutën, sigurisht që mund të rregullohet në një kod.
