Certifikata fake e COVID-it fut Granit Xhakën në telashe: Rrezikon deri në 5 vite burg, mbetet jashtë Kombëtares së Zvicrës

Granit Xhaka është përballë një prej çështjeve më serioze jashtë fushës së futbollit. Kapiteni i Zvicrës po hetohet nga Prokuroria e Kantonit të Luzernit për një certifikatë vaksinimi kundër COVID-19, ndërsa vetë futbollisti ka pranuar tashmë se gjatë pandemisë siguroi një vërtetim vaksinimi, një vendim që sot e quan “gabim”.

Çështja ka sjellë menjëherë edhe pasoja sportive. Xhaka nuk do t’i bashkohet Kombëtares së Zvicrës për grumbullimin dhe ndeshjet e ardhshme të Ligës së Kombeve. Vendimi është marrë në marrëveshje mes futbollistit dhe Federatës Zvicerane të Futbollit, e cila njoftoi se situata do të rivlerësohet pas përfundimit të këtij grumbullimi.

Në qendër të hetimit është certifikata e vaksinimit kundër COVID-19. Prokuroria e Luzernit ka konfirmuar hapjen e procedimit dhe po heton nëse në këtë rast ka pasur sjellje penalisht të dënueshme, konkretisht në lidhje me sigurimin e një dokumenti me përmbajtje të rreme dhe/ose falsifikimin e dokumenteve.

Rasti mori një kthesë të rëndësishme këtë të hënë, kur Xhaka vendosi të flasë publikisht. Mesfushori pranoi se në periudhën e pandemisë kishte siguruar një vërtetim vaksinimi, duke e lidhur vendimin e tij të asaj kohe me frikën, pasigurinë dhe mosbesimin që kishte ndaj vaksinës. Ai shprehu keqardhje dhe deklaroi se do të bashkëpunojë plotësisht me autoritetet.

Deklarata e Granit Xhakës:

“Gjatë ditëve të fundit është raportuar shumë për një çështje nga e kaluara ime. Për këtë arsye, dua të shprehem personalisht.

Në lidhje me vaksinimin kundër Covid-19, në atë kohë isha personalisht shumë i pasigurt dhe kisha shqetësime të mëdha. Kisha një mosbesim të thellë ndaj vaksinës dhe isha i ndikuar nga frika dhe pasiguria.

Në këtë gjendje të trazuar emocionale, unë sigurova një vërtetim vaksinimi, në vend që të sqaroja pyetjet e mia të hapura në rrugën e parashikuar.

Sot e kuptoj qartë se kjo rrugë nuk ishte e duhura. Ishte një gabim. Më vjen keq për këtë.

Unë marr përgjegjësinë për këtë vendim, jam i gatshëm për zbardhjen e plotë të fakteve dhe do të bashkëpunoj plotësisht me autoritetet përgjegjëse.

Granit Xhaka”.

Hetimi mund të ketë pasoja serioze ligjore. Në rast se procedura çon në akuzë dhe më pas në shpallje fajtor për falsifikim dokumentesh, legjislacioni zviceran parashikon edhe dënim me burg deri në pesë vjet ose dënim financiar. Ky është dënimi maksimal që parashikon ligji për veprën përkatëse dhe nuk do të thotë se Xhaka është dënuar apo se do të marrë domosdoshmërisht një dënim të tillë.

Sipas raportimeve në mediat zvicerane, Xhaka pritet të merret në pyetje nga Prokuroria e Luzernit në fillim të tetorit. Hetimi lidhet edhe me një mjeke në Luzern, ndërsa gjatë procedurës do të përcaktohet se çfarë ka ndodhur konkretisht me certifikatën dhe nëse janë konsumuar vepra penale. Për Xhakën dhe personat e tjerë të përfshirë vlen prezumimi i pafajësisë deri në një vendim përfundimtar.

Ndërkohë, Zvicra do të duhet të vazhdojë pa kapitenin e saj. Kombëtarja është grumbulluar në Belek të Turqisë për ndeshjet e Ligës së Kombeve, ndërsa Federata Zvicerane ka bërë të ditur se pas përfundimit të këtij cikli ndeshjesh do të diskutojë sërish me Xhakën për hapat e mëtejshëm.

Për momentin, 33-vjeçari përballet me dy pasoja të drejtpërdrejta: qëndrimin jashtë Kombëtares dhe një procedim penal që pritet të sqarojë nëse mënyra se si u sigurua certifikata e vaksinimit përbën vepër penale sipas ligjit zviceran.