Operacioni Forca e Ligjit u ka dërguar formularin për deklarimin e pasurisë 3 subjekteve të tjerë, të përfshirë në veprimtari kriminale.
Bëhet fjalë për vëllezërit Valentino dhe Arben Kaçorri, si dhe për Ervis Martinaj.
Valentino Kaçorri rezulton i dënuar në Itali për vrasje dhe trafik armësh, ndërsa Arben Kaçorri për vrasje me paramendim.
Ervis Martinaj nga ana tjetër është një emër i njohur për drejtësinë shqiptare.
Ai ishte një ndër personat që u përfshi në shkëmbimin e zjarrit mes dy grupeve në një lokal në zonën e Bllokut, më 4 tetor të 2018-ës.
Si pasojë e të shtënave Martinaj dhe Eljo Hato mbetën të plagosur, ndërsa miku i tyre Fabian Gaxha humbi jetën.
Në tetor dhe nëntor të 2019-ës, ndaj Martinajt u vendosën dy masa sigurie “Arrest me burg” 30 ditor”.
Prokuroria kishte ngritur një sërë akuzash ndaj tij: “Vrasja në rrethana të tjera cilësuese në bashkëpunim mbetur tentative”, “Prodhim dhe mbajtja pa leje e armëve të zjarrit”,“Falsifikim të pasaportave apo letër njoftimeve”, “Pastrimit te produkteve te vepres penale ose veprimtarise kriminale”, “Fshehje të ardhurash”, “Organizimi i lotarive të palejuara” dhe ”Vënia në dispozicion e lokaleve për lojëra të palejuara”.
Pavarësisht akuzave, më 2 maj të 2019-ës, gjykatësi Artan Gjermeni firmosi lirimin e tij për një garanci pasurore prej 5 milion lekësh të rinj.
Ndërkohë në kërkim për ngjarjen e rëndë janë ish-i dashuri i Elvana Gjatës Ervin Mata dhe ish-komando i ushtrisë, Merviol Bilo, i cili akuzohet për vrasjen e Fabian Gaxhës.
Sipas Prokurorisë, shkak për përplasjen me armë është bërë një pazar droge i pashlyer.
