Kryeministri Edi Rama ka qenë mbrëmjen e sotme i ftuar në emisionin “Real Story” ku ka folur rreth çështjeve më të rëndësishme politike.
Mirëpo, fillimisht ai ndau një sekret në nisje të emisionit pasi tregoi se në shtëpinë e tij sonte kishte festë.
Kështu, Rama kërkoi leje për t’u larguar pak më herët, duke thënë se sonte feston ditëlindjen e vajzës së tij dhe se e ka të pamundur të mungojë në këtë festë, pasi as bashkëshortja e tij, Linda, nuk mund ta mbulojë dot.
“Do iu kërkoj leje, se do iu lë pak më shpejt, pasi kam ditëlindjen e vajzës dhe nuk mund të mungoj. Herët e tjera Linda më justifikon, por këtë radhë nuk mundet”, tha Rama.
Për tu rikthyer te politika, , Rama u shpreh se është i gatshëm të bëjë marrëveshje me kreun e Partisë Demokratike, Lulzim Basha, në çdo datë dhe çdo kohë, përveç datës 17 nëntor, kur është çlirimi i Tiranës, pasi sipas kreut të qeverisë, Basha ka qenë kryebashkiaku më i dështuar.
Pjesë nga biseda:
Lela: Marrëveshje tjetër me Bashën, si ajo e 17 majit?
Rama: Në çdo sekondë jam gati të bëj marrëveshje, përveç 17 nëntorit, që e kemi çlirimin e Tiranës dhe nuk merrem me kryetarin e dështuar.
Lela: Zgjedhje të parakohshme?
Rama: Unë jam vetëm një gjë të parakohshme në kokë, rindërtimin.
Po ashtu, kreu i qeverisë foli edhe rreth menaxhimit të parave që janë dhuruar për pasojat e tërmetit, duke deklaruar se në procesin e dhënies së parave do marrin pjesë vetë donatorët.
Rama u shpreh se opozita nuk do marrë pjesë, pasi oponencën më të mirë mund ta bëjnë ata që kanë dhënë paratë.
“Kemi angazhuar një mekanizëm për transparencën dhe mbi të gjitha për ecurinë. Komiteti ynë i ngritur do të ketë pjesëmarrje edhe të donatorëve. Oponencë më të mirë do të kemi vetë ata që kanë dhënë paratë”, tha Rama.
