Në prag të festës së Pavarësisë së Kosovës, 17 shkurt, duket se situata politike në vend nuk është dhe aq e qetë.
Sikur të mos mjaftonin problemet në vendosjen e qeverisë pas zgjedhjeve të tetorit, Kosova po has probleme edhe në marrëdhëniet e saj me Serbinë.
Presioni që SHBA po ushtron prej javësh ndaj Kosovës, që nisën me të dërguarin e Trump Richard Grenell, e deri tek Konferenca e Sigurisë që po zhvillohet në Mynih, kanë krijuar një klimë të ashpër në shtetin shqiptar.
Dy ditë më parë Presidenti i Kosovës, Hashim Thaci dhe ai i Serbisë, Aleksander Vuçiç, nënshkruan 2 marrëveshje: një për linjën hekurudhore Prishtinë-Beograd dhe një për autostradën.
Kryeministri i Kosovës, Albin Kurti deklaroi menjëherë se zyrtarët që kanë firmosur marrëveshjen për hekurudhën dhe autostradën me Serbinë nuk kanë marrë autorizimin nga qeveria e re e Kosovës, as për të nënshkruar madje as për të negociuar një marrëveshje të tillë.
Së fundmi gjatë takimit në Samitin e Mynihut një përfaqësues i opozitës serbe, Boshko Obradoviç, ka deklaruar në Berlin se prej muajsh kanë nisur negociatat ‘sekrete’ për të zgjidhur çështjen e Kosovës.
Sipas Obradoviç ‘negociata sekrete’ , kanë nisur edhe si shkak i kundërshtimit të Beogradit, në pengimin e negociatave me Prishtinën derisa të zhduket taksa 100 %, kanë shkruar mediat e huaja.
Opozitari serb shton më tej se në diskutimeve sekrete përfshiheshin edhe marrëveshjet e nënshkruara së fundi në Berlin e Mynih mes Prishtinës dhe Beogradit për linjën ajrore, hekurudhat dhe autostradën.
Kujtojmë se disa ditë më parë SHBA arriti kulmin në presionin e saj, pasi tha se nëse Kosova nuk heq taksën ndaj Serbisë do ndalojë të gjitha investimet.
Pas kësaj Kurti tha se është i gatshëm të ulet në tryezë me Serbinë pavarësisht nëse Beogradi zyrtar kërkon apo jo falje për genocidin në Kosovë.
