Teksa kanë mbetur edhe pak ditë nga 17 shkurti, dita kur do mbahet Konferenca e Donatorëve për Shqipërinë pas tërmetit të nëntorit, Rama vijon takimet me krerët e shteteve të ndryshme.
Së fundmi, kryeministri, i shoqëruar nga Arben Ahmetaj dhe Anila Denaj, ka qenë në Abu Dhabi ku ka takuar Princin e Kurorës, Sheikh Mohamed Bin Zayed Al Nahyan.
Nëpërmjet një videoje të publikuar në Facebook, Rama shkruan se takimi është bërë enkas për Konferencën që do mbahet në Bruksel, por nuk ka zbuluar më shumë detaje.
Kujtojmë se Emiratet e Bashkuara Arabe i kanë dhuruar Shqipërisë 13 milionë AED, ose 3 milionë euro, menjëherë pas tërmetit.
Në raportin e fundit të bërë publik nga qeveria dëmet e tërmetit shkatërrimtar llogariten në 985 milionë euro.
Bashkimi Europian do të organizojë konferencën e donatorëve ndërkombëtarë me 17 shkurt në Bruksel për të mbështetur përpjekjet e rindërtimit në vendin tone pas tërmetit të 26 nëntorit.
Në këtë konferencë do të marrin pjesë vendet e BE, partnerët e Ballkanit Perëndimor dhe përfaqësues të shtetve të tjera.
