Këshilli i Lartë Gjyqësor ka rrëzuar kërkesën e ish kryetarit të Gjykatës së Gjirokastrës, Guximtar Boçi, për t’u kthyer në detyrë.
Këshilli i Lartë i Drejtësisë, vendosi shkarkimin e gjyqtarit, pas video-skandalit të publikuar në emisionin investigativ ‘Stop’.
Mirëpo Boçi u shpall i pafajshëm nga Apeli i Vlorës në shtator të 2018-ës dhe kërkoi rikthimin në detyrë, shkruan ‘Newsbomb’.
Në video-skandalin e publikuar nga ‘Stop’, qytetarja Rudina.I., denoncoi publikisht gjyqtarin, se i kishte kërkuar marrëdhënie seksuale, në këmbim të një vendimi për çështje pronësie me ish-burrin dhe vjehrrën.
Qytetarja pretendonte se Boçi e kishte puthur në zyrë dhe i kishte kërkuar të kryenin marrëdhënie seksuale.
Ajo e denoncoi gjyqtarin pasi humbi gjyqin dhe ky i fundit u akuzua për disa vepra penale, midis të cilave edhe ‘Korrupsioni pasiv’.
Me marrjen e pafajësisë, ish-kryegjyqtari i drejtoi KLGJ-së një kërkesë, ku pretendohet se audio-përgjimi i qytetares është i sajuar me programe kompjuterike.
